Horeeee, BBM Naek Deui!

Salasa, 18 Nopember 2014, harga BBM (Bahan Bakar Minyak) naek deui. Hahargaan nu sejenna naek deui. Balarea ngaheruk deui. Mahasiswa di mana-mana demo deui. Pamarentah disalahkeun deui. Wakil ra’yat hohoak deui. Teu aneh, ti bareto oge kitu modelna dina kahirupan bangsa Indonesia teh: asa tacan aya kreatifna. Atuh coba sakali wae mah, ari harga BBM naek teh balarea surak, mahasiswa ngengklak, ngarah pamarentah nyakakak, jeung wakil ra’yat ngabarakatak. Mun kitu, insya Alloh moal aya nu ticengklak.

“Abdi mah moal ambil pusing,” cek Hira Karmachela, S.Pd, ACA, 24 taun, seniman grafis anu ngajar multimedia di SMK Al-Wafa Ciwidey Kabupaten Bandung. “Harga BBM atawa harga barang naon wae bade sabaraha oge mangga teh teuing, nu penting mah ku abdi tiasa kapeser,” pokna deui.

Hira ngaku, mun saukur ngandelkeun gaji tina ngajar, ku naekna harga-harga kabutuhan poko teh geus matak gegebegan. Ngan ku sabab, di luar ngajar aktif usaha salaku seniman grafis, nya alhamdulillah sakabeh pangabutuhna bisa kacumponan. “Aya dua cara pikeun ngungkulan masalah naekna harga-harga kabutuhan teh,” cek Hira nembongkeun pamadeganana. “Kahiji, ku cara ngurangan pangabutuh, nu kadua ku cara ngaronjatkeun panghasilan,” pokna deui ngajentrekeun.

Tina dua cara eta, Hira milih cara anu kadua, nya eta ngaronjatkeun panghasilan. “Apan tadi tea prinsip abdi mah, mangga bae pangaos barang-barang bade tingterekel oge, nu penting ku abdi tiasa kapeser,” cek Hira. “Kantenan ku ayana gagasan revolusi mental sareng ekonomi kreatif mah, urang teu pantes humandeuar ngayonan masalah kahirupan,” pokna deui daria.

Hira kaasup seniman multitalenta. Sajaba ti ngulik kana seni grafis, Hira oge ngulik dina senirupa murni, jeung seni sastra. “Abdi tos ngarang tilu novel fantastik,” cek Hira. Ngan eta novel-novelna tacan sempet dikirimkeun ka penerbit. Lian ti eta, Hira sok nyieunan boardgame. Geus opat kali Hira miluan pameran boardgame di ITB (Institut Teknologi Bandung). Hasil karya anu dipamerkeunana dimuat dina www.karmachela.com. Pangabisana Hira salaku seniman grafis jeung game developer geus kaaku ku balarea, boh di Indonesia, pon nyakitu di mancanagara, kayaning Cina, Australia, Amerika Serikat, Qatar, India, jeung sajabana ti eta. Ngaliwatan internet, Hira ngajual karya-karyana anu kreatif. “Alhamdulillah, danget ieu klien abdi langkung seueur ti mancanagara,” cek Hira ngajentrekeun. Ku kituna, pikeun Hira mah waktu teh kalintang pentingna. Tiap waktu kudu ngahasilkeun karya anu kreatif, da cenah pagawean seniman mah berkaryajeung berkreasi.

Resep cenah berkaryajeung berkreasi teh. Angot hasilna mucekil mah. Tina ladang berkarya jeung berkreasi teh Hira bisa ngumpulkeun duit pikeun nyumponan sakabeh pangabutuhna. “Alhamdulillah, karya-karya abdi seseueurna dibayar ku dollar,” pokna bari seuri. Ku sabab kitu, Hira teu gimir ku naekna BBM anu ngepek kana naekna harga pangabutuh sejenna. [] Endang GG