Kolot Ayeuna Eleh ku Anak

Dititah ku kolotna make sapedah motor. | sundaonline.com

Teu bisa dipungpang deui, eta barudak anu sok marake sapedah motor teh tetela ngarempak aturan. Maranehna geus pasti make sapedah motor ka jalan raya teh henteu mawa Surat Ijin Mengemudi (SIM), oge Surat Tanda Nomor Kendaraan (STNK), sabab maranehna can boga Kartu Tanda Penduduk (KTP), da puguh di bawah umur keneh. Tong boro anu can boga KTP, anu geus boga KTP oge can karuhan gampang hayang boga SIM teh, sabab can tangtu lulus dina tesna. Sanajan kitu, eta barudak henteu bisa disalahkeun kitu bae. Barudak rumaja, angot barudak lemet mah, puguh tacan asak wiwekana. Pikeun maranehna mah resep we nu aya lamun bisa momotoran di jalan teh. Ana kitu, atuh saha biangkerokna? Naha kudu nyalahkeun pulisi atawa guru anu ngawarahna di sakola? Ke heula, ulah sok gampang nyalahkeun batur.

Pangna barudak bur-ber marake sapedah motor di jalan raya teh tangtu ku sabab meunang idin ti nu jadi kolotna. Da lamun ku kolotna teu diidanan mah, kawasna eta barudak moal wanieun make sapedah motor ka jalan. Jebul pertanyaan, naha kolot-kolotna bet ngidinan eta barudak make sapedah motor? Numutkeun katerangan anu katampa ku sundaonline.com, pangna eta kolot ngidinan anakna make sapedah motor teh ku sabab anakna geus dianggap pinter ngajalankeun sapedah motor. “Alit keneh oge pun anak mah tos pinter kana sapedah motor,” cek hiji kolot kebek ku kareueus basa ngawangkong jeung sundaonline.com.

Ngahaja arulin make sapedah motor. | sundaonline.com

Tapi apan tacan waktuna barudak make sapedah motor mah? “Numawi sesah dicaramna pun anak mah,” cek hiji kolot lianna ka sundaonline.com. Omongan sarupa kitu teh lain ti hiji dua kolot, tapi umumna nu jadi kolot ngomong kitu dina sual anak-anakna nu sok make sapedah motor. Ayana ketak sarupa kitu, hartina ciciren yen kolot kiwari eleh ku anak. Kolot kiwari hengker dina palebah ngabela bebeneran.

Aya deui kolot anu ngahaja meuli sapedah motor sangkan anakna bisa indit ka sakola make sapedah motor sorangan. Padahal anakna teh kakara kelas hiji SMA. “Abdi mangmeserkeun sapedah motor teh ngarah pun anak gancang mandirina,” cek hiji kolot nu lianna deui bari rada agul ngomong kituna teh.

Padahal numutkeun aturan mah, alesan-alesan sarupa kitu teh henteu bisa ditarima. Salah mah nya salah we. Intina, loba kolot anu nyaah dulang ka anak-anakna. Siga nu enya nyaah padahal mah ngadidik teu bener ka nu jadi anak. Pek we lenyepan. Kumaha lamun eta barudak anu tacan boga lilingeran teh nabrak batur? Kumaha lamun maranehna keuna ku razia pulisi di jalan raya? Kumaha lamun anak-anakna kalah ka jadi anggota atawa ketua geng motor?

“Ah, da dieu mah tara aya razia,” eta kolot aya ku keukeuh henteu narima lamun anakna dihalang-halang make sapedah motor. [] Endang GG