Naha Barudak Can Sawawa Make Sapedah Motor?

Barudak SMP keur marake sapedah motor di jalan Perumahan Bumi Parahyangan Kencana 
Kabupaten Bandung. | sundaonline.com

Kiwari beuki loba barudak anu sok make sapedah motor. Geus puguh barudak SMA jeung SMK mah. Barudak SMP oge loba. Malahan mah barudak satepak anu masih sakola di SD oge teu kurang-kurang nu sok make sapedah motor teh. Padahal cek aturan mah apan maranehna can meujeuhna ngagunakeun sapedah motor, sabab umurna can sawawa. Tapi atuh naha eta barudak mani bebas make sapedah motor? 

Teu hese manggihanana barudak nu can sawawa marake sapedah motor teh. Di perumahan Sanggar Indah Banjaran jeung Bumi Parahyangan Kencana Kabupaten Bandung oge loba. Di perumahan sabudeureunana loba deuih. Malahan di luar kompleks perumahan oge gampang manggihan barudak lemet make sapedah motor teh. Kawas di Jalan Ciluncat jeung Tenjolaya, Kacamatan Cangkuang Kabupaten Bandung. Barudak pasuliwer marake sapedah motor. Angot tempona budalan sakola mah. Sundaonline.com remen mireungeuh barudak sakola anu disaragam bodas biru kaluar tina tempat parkir make sapedah motor.

Tapi tempat parkirna lain anu aya di jero sakolana. Da meureun moal diidinan ku pihak sakola pikeun maranehna (barudak SMP, red.) markirkeun sapedah motorna, sabab tempat parkir nu di jero sakola mah pikeun neundeun kandaraan kapala sakola, guru, jeung karyawan di eta sakola. Jadi, anu dimaksud tempat parkir eta barudak teh nya eta tempat parkir anu diayakeun ku warga di sabudeureun sakolana. Da lamun teu disadiakeun tempat parkir ku warga mah, tangtu bae sapedah motor anu dibawa ku barudak sakola teh bakal ngaheurinan jalan. Ongkoh deui, ku ayana eta tempat parkir, jadi sumber pendapatan. Kawasna eta warga anu ‘hideng’ ngayakeun tempat parkir kandaraan teh henteu bisa disalahkeun. Da moal aya haseup lamun taya seuneu. Kitu deui, moal aya tempat parkir lamun taya nu rek parkirna mah.

Puguh warga anu nyewakeun tempat parkir mah pantesna oge dibere cap jempol. Peta kitu teh meureun salasahiji conto ekonomi kreatif tea. Da ku lobana barudak lemet marake sapedah motor teh, ditilik tina jihat piduiteun mah, disebutna peluang bisnis. Ngan ieu peluangpantesna kudu dianulir, da piraku mupujuhkeun barudak anu can sawawa sina tetep marake sapedah motor! Lain henteu karunya ka nu nyewakeun tempat parkir. Lain hayang nutup panto rejekina. Dalah dikumaha atuh da apan ari aturan bebeneran mah kudu diajegkeun. Sanes kitu? [] Endang GG