Ngajual Bensin Rp 10 Rebu Per Liter, Batina Rp 500,00

Jual bensin gede modalna, saeutik batina. | sundaonline.com

Di Desa Sirnasari Kacamatan Leles Kabupaten Cianjur mah harga bensin di pengecer teh Rp 10.000,00 per liter. Lamun harga solar Rp 9.000,00 per liter. Harga sakitu masih bisa ditarima ku masarakat, da lamun ngahaja meuli ka pom bensin mah matak olok ongkos jeung waktos. Encan cape deuih di jalanna. Mangkaning kaayaan jalan ti Sirnasari ka Pom Bensin Tanggeung teh tacan mulus kabeh. Masih seueur nu renjulna.

Tapi, sanajan bisa ngajual Rp 10.000,00 per liter, lain hartina pengecer bensin di Sirnasari batina Rp 1.500,00 per liter. Batina mah teu beda jauh jeung Pa Anton, pengecer bensin di Sanggar Indah Banjaran Kabupaten Bandung. Soalna, pengecer di Sirnasari meuli bensinna lain ka pom, tapi ka Haji Basir. Jadi Haji Basir anu langsung meuli bensin ka pom mah.

Dina saban poena pengecer bensin di Sirnasari meunang untung tara leuwih ti Rp 20 rebu, sabab bensin anu kajual teh rata-ratana 20 liter sapoe. Atuh kitu mah ngan saeutik anggota masarakat Desa Sirnasari anu butuh bensin teh? Lain kitu hartina. Anggota masarakat Desa Sirnasari anu butuh kana bensin teh loba, ngan pengecer bensin loba deuih. Ku sabab kitu, tiap pengecer teu bisa ngajual bensin saloba-lobana. “Dina sadinten teh paling tiasa ngical 20 liter bensin,” cek Pa Kurnia Sudrajat anu mertuana (Haji Damiri) dagang bensin di buruan bumina. Lamun nunggal mah jadi pengecer bensinna, nya bisa jadi kawas Pa Anton ngajual 200 liter bensin saban poena. Tapi, ketang, di Sanggar Indah Banjaran Kabupaten Bandung oge lain Pa Anton wungkul anu dagang bensin teh.

Sanajan kitu, cek Pa Kurnia Sudrajat, bati saeutik oge teu diala mah moal boga. Ongkoh deui ngajual bensin mah itung-itung ngeuyeub-ngeuyeub warung we. “Da apan di dieu mah rata-rata anu ngawarung anu icalan bensin teh,” Kurnia Sudrajat ngajentrekeun. [] Endang GG