Pahlawan di Dunya Can Karuhan Pahlawan di Aherat

Dina lagu Karatagan Pahlawan geus kagambar kalayan eces, saha ari pahlawan teh. Tetela jalma anu bajuang di jalan Alloh demi nanjeurkeun bebeneran. Ari anu dimaksud bebeneran nya eta bener numutkeun pandangan Alloh ta’ala. Lamun bebeneran teu dieceskeun kitu, bisa jadi bebeneran anu dibelaan atawa nu rek ditanjeurkeun teh bebeneran anu ngaco. Apan papada jalma anu jahat oge bogaeun versi bebeneranana. Cek gegedugna penjahat, ari rek nipu ulah kawas maling atawa rampog. Henteu bener nipu cara kitu mah! Tuh nya, penjahat oge bogaeun versi bebeneranana sorangan. 

Matakna kudu eces, ngabela bebeneran teh bebeneran anu mana, anu kumaha, anu numutkeun saha.

Politisi, hakim, jaksa, pangacara, pulisi, tentara, dokter, guru, pangarang, penulis, wartawan, aktivis LSM, jeung saterusna ti eta can karuhan jadi pahlawan. Naha? Apan sidik aranjeunna teh milampah kahadean. Angot politisi mah, dina orasina oge nepi ka hohoak yen pangna dirina teterejel hayang asup kana politik teh ku sabab rek bajuang demi karaharjaan bangsa jeung nagara.  Tapi naha can karuhan jadi pahlawan? Hih, apan sagala oge kumaha niat. Niatna mikung mah nya mikung bae udaganana. Udaganana mikung nya mikung bae prak-prakanana oge. Ari sarwa mikung mah nya henteu lempeng tea kasebutna. Piraku politisi anu cigna jadi koruptor rek disebut pahlawan! Piraku hakim anu teu bener dina nanjeurkeun kaadilan rek disebut pahlawan! Piraku pulisi anu sok ngalakukan pungli rek disebut pahlawan! Piraku dokter anu sok ngalakukan mal praktek disebut pahlawan! Piraku wartawan anu resep nyebarkeun gosip, atawa resep meres ka batur, pantes disebut pahlawan!

Bisa wae ku pandangan dunya mah aranjeunna disebut pahlawan. Tapi can karuhan mungguhing pandangan Alloh mah. Apan pahlawan teh ahli sawarga tea. Dina pandangan dunya mah, guru oge disebut “Pahlawan Tanpa Tanda Jasa”. Eta kakara sesebutanana wungkul. Dina emprona mah—di aherat—can karuhan saban guru teh pahlawan. Da piraku guru anu ngedul atawa teu bener ngajarna disebut pahlawan. Angot ayeuna profesi guru anu pagawe negeri di urang keur kacida diajenanana sacara finansial. Hartina, bakal dosa kasebutna upama kana gawena lengle ari kana buruhna haripeut. Ari upahna dosa apan kasangsaraan di aherat tea—lamun henteu di alam dunya.

Kiwari Indonesia geus merdeka, bebas tina penjajahan Walanda jeung Jepang. Tapi perjuangan mah can lekasan, tur moal aya tamatna. Salila kumelendang di alam dunya, urang kudu bajuang. Bajuang pikeun nanjeurkeun bebeneran anu bener numutkeun pandangan Alloh. Bajuang satekah polah sangkan renggenek dina cara hirup anu jujur. Loba pisan gogodana pikeun hirup kalayan jujur teh. Dina sagala widang pagawean aya tangtanganana, nya eta kateujujuran pikeun jalma-jalma anu hayang hirup jujur. Hirup kalayan jujur anu ditungtun dituyun ku elmu Alloh Nu Luhung nya eta cara hirupna pahlawan. Geus sapantesna saban jalma midangdam dirina jadi pahlawan, nya eta jadi jalma anu baris meunang kabagjaan di aherat. [] Endang GG