Piraku nu Teu Damang Teu Dilayad

Pa Dadan nuju ngabekam Mamah Sanggar.

Pajarkeun teh warga di perumahan mah individualistik. Padahal mah henteu di saban perumahan kitu. Buktina di RT 01 RW 06 Sanggar Indah Banjaran Kabupaten Bandung mah wargana sauyunan. Lamun aya papait teh geus pasti sakabeh wargana milu aub. Kawas nu kaalaman ku Mamah Sanggar. Ieu eyang nu kagungan 12 putu teh nyorang teu damang ampir sasasih. Teu kiat ku hawa tiris, sabada asam urat teh sesek sareng maagna kanceuh deui. Ngan alimeun dirawat di rumah sakit, da nu atos-atos oge dirawat di rumah sakit teh henteu damang, malah nu puguh mah matak ngabarubahkeun balarea. Ku kituna Mamah Sanggar milih dirawat di bumi bae ku putra-putrina.

Anjeunna dilandongan ku terapi pijat, bekam, gurah, sareng herbal. Kaleresan terapisna, Pa Dadan Supriatna ti Rumah Sehat Ad-Dzikru anu pernahna di Jalan Ciluncat, Kacamatan Cangkuang Kabupaten Bandung, kersa diangkir sumping ka bumina Mamah Sanggar.

Warga RT 01 RW 06 Sanggar Indah Banjaran Kabupaten Bandung  
nuju ngalayad Mamah Sanggar. 

Alhamdulillah tatanggi-tatanggina rajol ngaralayad. Malah aya anu unggal dinten ngalayadna. Diwuwuh ku jiad pangdu’a ti kadang wargi anu aya di Pakidulan Cianjur sareng Cimaja Sukabumi. Puguh bae Mamah Sanggar pohara bingahna. Ku ayana kabingah dina manahna, katingali Mamah Sanggar majeng ka damang. Aamiin ya Robbal ‘alamin.

Eta kanyataan geus ngagugurkeun anggapan yen warga perumahan mah ngalayad nu teu damang teh lamun anu teu damangna dirawat di rumah sakit. Padahal anu teu damang teu ka rumah sakit teh boa teuing bawaning ku teu mampuh waragadna, atawa eta nu teu damang teu resepeun ku pangobatan sacara medis atawa kimiawi, atawa nu teu damang teu ka rumah sakit teh ku lantaran dokterna tos angkat tangan alias awahing ku parna panyawatna. Ku ayana pandangan sarupa kitu warga RT 01 RW 06 Sanggar Indah Banjaran Kabupaten Bandung mah kacida mentingkeunana ngalayad warga anu teu damang teh, boh anu dirawat di rumah sakit, pon nyakitu anu dirawat di bumina. [] Endang GG