RSS keur Saha?

Batan sina dicicingan ku jalma nu tuna wisma, ieu imah diculkeun sina buruk ku nu bogana.
| sundaonline.com

Rumah Sehat Sederhana (RSS) teh ti awalna geus diancokeun pikeun masarakat  golongan ekonomi menengah ke bawah. Pikeun miboga eta imah, henteu sagawayah, kudu bener-bener warga anu tuna wisma alias tacan boga imah. Sangkan dipercaya, waktu ngamprah hayang mibanda imah teh eta warga kudu nembongkeun bukti ti pamarentah yen dirina enyaan tacan boga imah. Ieu aturan teu bisa diganggu gugat, sabab RSS teh minangka solusi ti pamarentah pikeun ngungkulan masalah warga anu tacan boga imah.

Tangtu bae alus kasebutna eta pamadegan pamarentah teh. Ngan hanjakal, dina emprona mah loba jalma beunghar—anu imahna geus loba—mibanda RSS meh di saban perumahan. Ana kitu, udagan pamarentah pikeun ngaraharjakeun rahayat anu masakat teh kandeg.

Pikasebeleunana, imah anu dibeulina teh henteu dicicingan—da ku geus loba imahna tea. Disewakeun atawa dikontrakkeun henteu deuih. Antukna imahna teh kosong henteu kaurus nepi ka burukna. Henteu hese neangan kanyataan sarupa kitu teh. Di Perumahan Sanggar Indah Banjaran, Bumi Parahyangan Kencana, Gading Tutuka, jeung perumahan (RSS) sabudeureunana di Kabupaten Bandung, kaitung loba imah anu geus buruk. Lebah dieu, matak ngenes karasana. Henteu rek ngenes kumaha atuh da apan pikeun anu tuna wisma mah eta teh sarua jeung nyolok mata buncelik. Bayangkeun, panon nu buncelik dicolok, abong lamun teu matak nyeri teh. Malah lain bae nyeri, tapi panon dicolok mah matak lolong. Tapi faktana loba keneh jalma jegud di urang anu tingkahna harianeun. Taya rasa empati ka masakat teh. Padahal jalma anu tuna wisma di urang teh pabalatak keneh.

Lamun hal eta dibaekeun, tangtu jalma anu jaregud teh moal aya euihna. Jadi hadena pamarentah ulah calikeun. Da apan gagasan ayana RSS teh sakitu saena. Ngan lebah prak-prakanana pamarentah kedah caringcing. Perelu ayana sangsi sosial pikeun jalma-jalma jegud anu ngagalaksak kana RSS. Lamun masalah ieu kaluli-luli, mangka bakal jebul pertanyaan: ari RSS teh pikeun saha? [] Endang GG