Saha Ari Pahlawan Teh?

Parade Juang Surabaya

Alhamdulillah, 10 Nopember masih dianggap poe bersejarah, nya eta hari pahlawan. Rupa-rupa kagiatan masarakat pikeun mieling eta poe bersejarah bisa katempo ku urang. Kawas anu dipintonkeun ku televisi, tanggal 9 Nopember 2014 rebuan masarakat Surabaya, Jawa Timur, ngayakeun acara Parade Juang Surabaya. Pon nyakitu di kota-kota lianna masarakat haget tur saregep mieling hari pahlawan.

Saenyana, saha ari pahlawan teh? Numutkeun pelajaran sajarah di sakola mah, pahlawan anu dipieling saban tanggal 10 Nopember teh nya eta sakumna pajuang kamerdikaan Indonesia. Nurutkeun asal-usul kecapna, pahlawan teh asal tina kecap pahala jeung wan. Pahala hartina ganjaran anu hade. Ari wan nuduhkeun ka jalma anu milampah kahadean kalayan sukarela alias ihlas tea. Dina lagu Teu Honcewangdigambarkan pasipatan pahlawan teh sarupa kieu:

Teu honcewang sumoreang

Tekadna pahlawan bangsa

Cadu mundur pantrang mulang

Mun maksud tacan laksana

Berjuang keur lemah cai

Lali rabi tur tegang pati

Taya basa menta pamulang tarima

Iklas rido keur korban merdeka

Sinatria danalaga

Bela bangsa jeung nagara

Dibarengan tekad suci

Berjuang keur lemah cai

Teu ngingetkeun ka dirina

Asal nagri bangsa waluya

Kadar jembar raharja mukti wibawa

Gembleng tujuan Pahlawan Bangsa

Pasipatan parapajuang kamerdikaan sarupa merenah pisan disebut pahlawan. Demi kamerdikaan, loba parapajuang anu tumpur di pangperangan. Buah tina perjuanganana, nya eta kamerdikaan anu ayeuna karasa ku urang sarerea, teu kaalaman ku aranjeunna anu parantos pupus dina mangsana perjuangan. Tapi perjuanganana henteu gaplah, da aranjeunna di aherat bakal kenging wawales anu hade ti Pangeran Nu Maha Kawasa, nya eta wawales nu mangrupa pahala surgawi.

Dina Baratayuda, Batara Kresna nganasehatan Dina Baratayuda, Batara Kresna netelakeun ka Arjuna anu unina kieu: Geura prak cumponan sakabeh kawajiban anjeun, bari tong ngarep-ngarep pamulangna. 

Cindekna mah, pahlawan teh ahli sawarga tea. Sacara ekstrim, anu kaasup ahli sawarga teh nya eta pararosul, paranabi, jeung sakumna manusa anu biluk kana ajaranana.

Nyoko kana hal eta, mieling hari pahlawan teh lain ngan mieling jasa-jasana parapajuang kamerdikaan wungkul. Tapi, anu utama nya eta miconto kana pasipatanana. Dina sajeroning kumelendang di alam dunya, lakuning lampah urang kudu kawas parapajuang kamerdikaan. Tutulung ka nu butuh, atawa tatalang ka nu susah, bari taya basa menta pamulang tarima, alias ihlas rido tea, minangka conto kongkrit laku lampahna jalma anu pantes disebut pahlawan. [] Endang GG