Sehat jeung Loba Duit

Ilustrasi

Baraya, cobi pilih, mending sehat atawa seueur artos? Aya jalma anu songong nyebutkeun yen dirina milih loba duit batan sehat. Sabab, cek pikirna, lamun loba duit mah sanajan gering oge moal keueung. Sabalikna, masih cek eta jalma songong, sehat oge bakal susah upama teu boga duit mah. Lamun susah wae nya gering ka dituna. Lamun geus gering nya jadi dobel kasusahna, da apan teu boga duit jeung ririwit.

Padahal cek jalma jegud tapi ririwit, teu genah loba duit oge ari ririwit mah. Bayangkeun we, ari duit miliaran, tapi sapopoena nangkarak bengkang dina ranjang bari selang rapang saawak-awak. Kulit dicocogan ku jarum infusan. Liang irung nepi ka liang penis atawa vagina dirojokkan ku selang. Sanajan cicing di kamar rumah sakit anu VIP oge ari kitu mah moal genah karasana. Angot bari stroke mah. Ketang, tong waka kana stroke, pikeun lalaki mah dibere impotensi oge geus asa tungkeb bumi alam. Enya, loba duit tapi impoten, hah, cumah!

Samarukna sagala bisa dibeuli ku duit. Padahal perkara nu nyageurkeun mah lain duit. Lamun Alloh anu ngusik malikkeun henteu ngersakeun mah, jalma beunghar anu geus bung-beng uubar ka mana-mana moal cageur. Lamun kitu nyatana, baraya masih bade milih seueur artos batan sehat?

Dumasar kana kasehatan jeung kauanganana, aya opat golongan jalma di ieu kolong langit. Kahiji, jalma anu sehat tapi minim duitna. Kadua, jalma anu loba duitna tapi ririwit. Katilu, jalma anu nya ririwit nya minim duitna. Kaopat, jalma anu sehat jeung loba duitna.

Rereana jalma pasti milih golongan anu kaopat, nya eta sehat bari loba duit. Ieu pilihan teh manusiawi. Ngan can tangtu bener. Sehat bari loba duit oge can karuhan aya dina rido Alloh jeung kabarokahan ari salila hirupna henteu mangpaat pikeun balarea.

Sawangsulna, rereana jalma pasti embungeun asup kana golongan anu katilu, nye eta jadi jalma anu ririwit bari minim duitna. Lamun baraya aya dina golongan anu ieu tong alit manah. Ihtiar mah ulah kendat-kendat, tapi kedah bari pasrah—sumerah diri—kana pangersa Pangeran Nu Maha Kawasa. Dina pawayangan, Batara Kresna mere pandangan ka Arjuna anu unina kieu: Tandaning kanyaah-Na, Gusti Nu Mahaasih mere hadiah ka umat anu dipikacinta-Na mangrupa kasakit, kamiskinan, jeung aeb.

Tapi eta pandangan teh bakal katarima ku jalma anu iman kana takdir. Ku kituna, sanajan miskin jeung ririwit, eta jalma bakal tetep gumbira hatena, oge tingtrim pikiranana, sabab manehna bisa narimakeun sarta sukuran dina sagala hal. Ku kituna, kacida teu benerna upama urang ngarasula dina kaayaan henteu sehat tapi loba duit, atawa kurang duit tapi dibere keneh sehat. Malah ku ulama mah ditetelakeun yen kasakit—kanyeri, kapeurih, kanalangsa—teh  penggugur dosa. [] Endang GG