Sibuk ku sabab Sehat

Ibu Umayah

Hendra jeung Hendri mani elekesekeng basa diajak ngawangkong ku Ibu Umayah sual kasehatan teh. Eta pamuda urang Pangalengan Kabupaten Bandung teh memang keur sibuk ku order. Maranehna geus boga jangji rek panggih jeung babaturanana anu butuheun handphone(hape) di Jalan Mohammad Toha Bandung. Tapi sore jangjian panggihna teh. Basa ngawangkong jeung Ibu Umayah mah masih kasebut isuk-isuk. Pangna elekesekeng teh dumeh hapena disada bae, disms jeung diteleponan ku babaturanana.

Ibu Umayah tumanya ka eta dua pamuda, “Hendra sareng Hendri orang sibuk, nya?”

Duanana unggeuk.

“Cing naon margina Hendra sareng Hendri tiasa sibuk?” Ibu Umayah tumanya deui.

“Seueur kagiatan, Bu,” Hendra ngawalon. Tuluy Ibu Umayah ngareret ka Hendri.

“Abdi mah bakat ku butuh we,” cek Hendri rada tatag.

Ibu Umayah seuri bari neuteup kalayan anteb ka eta barudak ngora. Tuluy pok deui nyarita. “Waleran Hendra sareng Hendri henteu lepat, ngan henteu tepat.”

Hendra jeung Hendri kerung.

“Saleresna, pangna urang tiasa sibuk teh sanes ku seueurna kagiatan, atanapi bakating ku butuh, tapi ku lantaran urang masih dipaparin sehat ku Alloh,” Ibu Umayah anu mantan asisten dokter teh ngajentrekeun. “Geura lamun urang dibere mencret, pasti sibukna oge robih janten bulak-balik ka WC,” pokna deui.

Hendra jeung Hendri ngabelengeh seuri bari unggut-unggutan.

Ku kituna, cek Ibu Umayah anu aktif salaku Leader Nasional di Komunitas Melia Sehat Sejahtera (MSS), kasehatan teh kudu dimumule ku cara hirup anu sehat. “Urang dipaparin sehat ku Alloh teh hartosna urang dipaparin amanat. Ku margi kitu urang hirup teh kedah amanah. Lamun teu amanah nya henteu bisa dipercaya tea kasebatna,” pokna deui kalayan tandes. [] Endang GG