Sule Loba Duit Teu Boga Waktu

Sule sakulawarga dina ini talk show, Saptu, 15 Nopember 2014. 

Saptu, 15 Nopember 2014, komedian Sule ulang taun anu ka-38. Ulang taunna dirayakeun dina televisi NET, nya eta dina acara initalkshow sacara live. Nu pikatajieun dina eta acara nya eta hadirna kulawarga Sule: istrina jeung opat anakna anu blak-blakkan ngungkabkeun eusi hatena ngeunaan Sule.

Samemeh sohor kawas ayeuna, Sule nyorang kahirupan anu seuseut. Pait peuheurna hirup geus kaasaan ku eta pelawak anu sagala bisa. Ku kituna, meujeuhna upama ayeuna ku balarea dipandang yen Sule katut kulawargana geus jadi jalma senang ku sabab geus jadi jalma anu sukses ngahontal cita-citana. Tapi, tetela, eta pandangan balarea teh ukur sangkaan wungkul, da buktina mah dina kaayaan anu salieuk beh teh Sule katut kulawargana ngemu rasa teu sugema. Cek Iki, anak Sule anu cikal, kasibukan Sule anu sakitu padetna, sarta minimna waktu Sule pikeun kulawarga geus jadi bangbaluh pikeun istri jeung anak-anakna. Sanajan ngama’lum kana kasibukan Sule, Iki katut adi-adina ngemu kakangen pikeun riung mungpulung jeung nu jadi bapa. Pon nyakitu Teh Lina, istrina Sule, midangdam cukupna waktu Sule pikeun kulawarga.

Teu bisa majar kumaha. Kulawargana Sule pasrah bae kana kaayaan. Da puguh langkana Sule aya di imah teh lain ulin. “Gua bekerja juga demi mereka,” cek Sule. Rek nepi ka iraha Sule sibuk jeung sibuk kawas ayeuna? Duka teh teuing. Anging Sule anu apal.

Tina eta pangalaman hirupna Sule sakulawarga, urang bisa metik hikmatna yen geuning duit teh lain sagalana. Pangabutuh tiap jalma di alam dunya, lian ti duit nya eta waktu. Buktina, loba duit tapi teu boga waktu geus karasa teu sugemana ku Sule sakulawarga. Sawangsulna, anu loba waktu tapi teu boga duit, sarua teu genahna. Tapi, untung keneh kasebutna, loba duit teu boga waktu atawa loba waktu teu boga duit mah. Nu paling pikawatireun mah saenyana jalma anu sibuk (teu boga waktu) tapi duitna minim. Padahal, anu dipidangdam ku pada umumna jalma nya eta boga duit jeung waktu anu cukup. [] Endang GG