Untung Aya Tukang Bensin!

Neng Widi, putuna Haji Damiri keur nyicikeun bensin kana tengki sapedah motor.
 | sundaonline.com

Pisapoeeun kana naekna harga BBM (Bahan Bakar Minyak), pom bensin digimbung ku balarea. Anu ngantay rek meuli bensin nepi ka leber ka jalan. Loba jalma nu ngarasa honcewang sieun teu kaagehan. Pa Anton (51 taun) pengecer bensin di Sanggar Indah Banjaran Kabupaten Bandung oge milu ngantay. Ngan pikasediheun Pa Anton mah, sabab anu ngantayna bari mawa jarigen mah dicarekkan ku aparat kaamanan. “Seueur jarigen anu ditajongan ku aparat,” cek Pa Anton ka sundaonline.com di tempat dagangna, Kemis, 20 Nopember 2014. Naha nepi ka kituna? “Atuh da saleresna mah, numutkeun aturan, icalan bensin kawas abdi teh henteu kenging,” pokna deui ngajentrekeun.

Dina kengingna oge, Pa Anton netelakeun, tukang dagang bensin teh kudu boga idin ti pamarentah satempat. Idin ti Ketua RT, Ketua RW, Lurah atawa Kapala Desa, nepi ka Camat. Tuluy ka Polsekta jeung Koramil. “Abdi oge kitu heula samemeh der icalan bensin di dieu teh,” Pa Anton anu dibaturan ku garwana ngeceskeun. Tah, eta surat idin teh minangka jadi kakuatan pikeun meunang pangladen ti pom bensin. Eta surat idin tiap tilu bulan sakali kudu dibaharui masa berlakuna. “Ku kituna tiap tilu sasih sakali abdi kedah mayar Rp 60 rebu ka kacamatan,” Ibu Anton ngajelaskeun.

Ngingetkeun kana aturan mah matak reyang-reying dagang bensin teh. Tapi, ari aya keneh lolongkrang mah, nya piraku nepi ka henteuna. Ongkoh deui, loba anggota masarakat anu butuheun kana ayana tukang bensin eceran atawa botolan teh.

“Abdi mah asa katulungan ku ayana pengecer bensin sapertos Pa Anton teh,” cek Nabila Az-Zahra (20 taun), warga Sanggar Indah Banjaran Kabupaten Bandung. “Kantenan nuju usum hujan mah, sok wegah ari kedah meser bensin ka pom teh. Kantenan deuih bentenna oge mung Rp 500,00 pangaos bensin di pom sareng di Pa Anton teh,” Nabila anu tamatan Teknik Sipil Politeknik Bandung (Polban) teh ngajentrekeun.

Angot di kampung mah. Kawas nu kaalaman ku warga Desa Sirnasari Kacamatan Leles Kabupaten Cianjur. Upama seug taya tukang bensin eceran, sigana geus lapur hayang tutumpakan make kandaraan bermotor anu kudu make bensin teh. Sabab, cek Kurnia Sudrajat, S.Pd., pikeun warga Desa Sirnasari mah, pom bensin pangdeukeutna teh anu aya di Tanggeung. Ari ti Sirnasari ka Tanggeung teh apan sakitu jauhna. Upama tumpak sapedah motor oge baris nyontang waktu dua jam. “Matakna asa katulungan ku ayana tukang bensin eceran teh,” eta guru SMP Negeri 3 Leles Kabupaten Cianjur teh ngajentrekeun.

Pa Sudrajat netelakeun, dina usum hujan mah deuih patani di Sirnasari oge merelukeun BBM, nya eta solar pikeun ngahurungkeun traktor di sawah. Upama meuli solar kudu ka Tanggeung, nya matak tanggel karasana. “Matakna untung aya nu dagang solar eceran di lembur teh,” pokna deui.

Ku kituna, aturan anu ngalarang dagang bensin eceran meunang diajegkeun saupama pamarentah geus sanggup ngayakeun BBM di saban desa, atawa geus ngomean infrastrukturna. [] Endang GG