Urang Sunda Kudu Atoh ku Ayana Hujan

Ilustrasi

Luh-lah deui, luh-lah deui. Enya mani taya rasa sukurna. Basa usum katiga humandeuar, da eta cenah panasna ngabetrak, kebul, jeung loba tatangkalan anu paraeh da kagaringan. Ayeuna usum ngijih humandeuar deui bae, da imah balocor, di jalan raya tambah macet ku lobana cileuncang. Angot pikeun urang Dayeuhkolot Kabupaten Bandung mah, dibere hujan teh matak gegebegan inggis ku banjir. Jadi atuh iraha rek sukuranana?

Hadena urang Sunda mah atoh asup kana usum hujan teh, sabab Sunda teh hartina cai, lambang subur ma'mur, nu mere pangrojong kana kahirupan sugrining mahluk. Matakna geuning karuhun baheula maparin ngaran patempatan teh loba anu diawitan ku Ci. Ku sabab kitu, teu merenah upama ngaku Sunda tapi hirupna bororaah ngarojong kana kamaslahatan manusa, malah sawangsulna matak mugurkeun batur. Teu ceehan, boboleh sieun ku eleh, hirupna linglung teu apal ti mana nya pamiangan ka mana nya pimulangeun.

Urang Sunda kudu atoh ku ayana hujan teh, sabab pikeun patani mah hujan teh mawa kahadean pikeun pepelakan. Patani teh dulur urang keneh. Upama aranjeunna atoh ku ayana hujan, nya urang oge kudu milu atoh: ulah luh-lah wae. [] Endang GG