Imah Mewah anu Saha?

Geuwat borong, tujuh poe deui naek harga imah teh.| sundaonline.com

Usaha properti dianggap usaha paling alus pikeun investasi. Dina properti mah taya istilah turun harga. Malahan mah urang boga kalaluasaan naekkeun harga suka-suka. Geura tingali we harga imah di perumahan. Angot perumahan elit mah. Hargana bisa naek saban bulan.

Harga ratusan juta rupiah pikeun imah anu elit mah geus prah. Kiwari mah, sebut bae di Kota Bandung, harga imah anu elit teh geus miliaran rupiah. Kawas di Antapani, harga imah teh Rp 1 M, Rp 1,3 M, Rp 1,8 M, jeung saterusna ti eta. Ngabandungan patingbeledagna harga imah samodel kitu, asa henteu percaya lamun rahayat di nagara urang masih aya nu sangsara.

Jebulna harga imah anu suka-suka teh hasil ‘kreativitas’-na tukang bisnis properti. Ku ayana anggapan yen properti mah hargana poek, nya si tukang bisnis matok hargana suka-suka. Manehna boga fatwa kieu: “Meuli tanah atawa imah mah moal aya rugina, sabab lamun dijual deui teh batina bisa lipet tikel.”

Padahal eta fatwa teh kudu dikaji ulang ku balarea, utamana ku pamarentah. Upama dibaekeun, harga imah di nagara urang bakal henteu asup kana logika, nya eta henteu keuna kana sistim pendapatan masarakat anu geus diatur ku pamarentah. Pek bae pikir, lamun harga RSS (Rumah Sehat Sederhana) bae geus teu kahontal ku karyawan anu gajihna upah minimeum, atuh komo imah mewah anu hargana salangit.

Kabuktianana, ku dug-degna perumahan elit, atawa imah-imah mewah anu hargana wah, kalah ka beuki loba warga nagara asing anu nyicinganana. Tuh, di Bandung Kaler, loba bule anu nyicingan imah mewah. Upama hal ieu tuluy-tuluyan kajadian, moal boa kota oge dikawasa ku bangsa deungeun. Akibatna, bangsa urang angger jadi jongos di imahna sorangan. Mimitina imah anu dicicingan ku bangsa deungeun, tuluy kota anu dikawasa ku bangsa deungeun, beh dituna moal boa nagara anu diatur ku bangsa deungeun. Lamun nepi ka kituna, bangsa katut nagara urang pasti leungit wibawana.

Ku kituna, ka bangsa urang anu bisnis properti, ari usaha teh kudu make lilingeran. Ulah asal meunang untung gede wungkul target teh, tapi kudu bari make rasa tanggungjawab sosial, da urang cicing di Indonesia teh lain sorangan. Sing inget, masih loba dulur urang anu butuheun imah sehat sederhana anu hargana cocok jeung panghasilanana. Ka pamarentah, poma tong kaolo ku pangolo ti parapangusaha properti anu resep ngulinkeun harga. Sapantesna pamarentah nyieun aturan anu ketat pikeun maranehna. [] Endang GG