Meuleum Jagong Maleman Taun Baru Geus Tradisi

Beuleum jagong dina malem taun baruan.| sundaonline.com

Duka kumaha asal-usulna, warga masarakat Bandung Raya mah saban malem taun baruan teh sok mareuleum jagong. Bari ngadagoan tanggal 1 Januari teh meh tiap kulawarga ngumpul bari meuleum jagong di buruan imahna sewang-sewangan. Atuh puguh we nu dagang jagong mah marema.

Pitilupoeeun ka taun baru oge nu dagang jagong teh geus rame. Di pasar-pasar nepi ka emper-emper jalan rame ku nu dagang jagong. Malah di komplek-komplek perumahan oge lar sup nu jualan jagong make roda atawa sapedah motor bari gogorowokan: “Jagooooong!!!! Jagoooong!!!!”

Tukang sayur anu sasarina ngajual rupa-rupa sayur jeung lauk oge banting setir jadi dagang heula jagong pikeun mapag taun baru teh. Lumayan, cek Mang Ocid, urang Desa Nagrak Kacamatan Cangkuang Kabupaten Bandung, dagang jagong dina mapag taun baru mah untungna mucekil. Ngarah bati tina per kilona mah teu gede. Ngan ku lobana anu meuli, jadi mucekil hasilna. Duka sabaraha batina Mang Ocid tina per kilo jagong anu dijualna. Eta mah rusiah perusahaan cenah. Ngan salila dua poe dagang jagong—30 nepi ka 31 Desember 2014—teh Mang Ocid bisa ngajual dua kuintal jagong.

Mang Ocid teu apal kumaha asal-usulna pangna masarakat resep meuleum jagong upama mapag taun baru. “Pokona mah tos beunang dicirikeun, mapag taun baru mah kudu dagang jagong,” pokna bari nyerengeh.

Warga masarakat anu mareuleum jagong oge teu apaleun naha bet kudu meuleum jagong dina maleman taun baru. “Pokona mah tos janten tradisi, da ti jaman abdi leutik, pun biang sareng pun bapa sok meuleum jagong ari maleman taun baru teh,” cek Ibu Sri Nurhayati ka kopean.com bari ngageber jagong anu keur dibeuleum luhureun ruhak di buruan imahna di Sanggar Indah Banjaran Kabupaten Bandung. [] Endang GG