Warga Cisabuk Angger Ngaheruk

Kaayaan jalan di Cisabuk (ti arah Kab. Bandung ka Kabupaten Cianjur) masih renjul, can kaomean. 
| sundaonline.com

Jangji pamarentah pikeun ngomean jalan di Desa Cipelah Kacamatan Rancabali Kabupaten Bandung geus ngabukti (baca: http://www.kopean.com/2014/07/taun-ieu-jalan-cipelah-rek-diomean.html). Ngan hanjakal can rampung. Basa sundaonline.com ngalongok ka eta desa, Jumaah, 26 Desember 2014, jalan nu geus diomean teh kakara semet SMP Negeri 3 Rancabali mun ti arah Kabupaten Bandung mah. Kitu oge jalan anu dibeton di hareupeun eta SMP teh kakara sabeulah. Hartina kakara dua kilo meter jalan nu geus diomean teh. Sesana, masih aya kana tilu kilo meter deui.

Ku sabab kitu, warga Kampung Cisabuk mah angger ngaheruk. Teu rek kitu kumaha, da perbaikan jalan di Desa Cipelah teh encan nepi ka Kampung Cisabuk. Angger bae jalan di Kampung Cisabuk mah orisinil bututna kawas sasari: renjul, teu matak genah upama tumpak kandaraan teh.

Ti arah Kab. Cianjur ka Kab. Bandung, tanjakan Cisabuk kacida netekna jeung leueur. Ku kituna loba kandaraan nu teu kuateun hanjat. Jadi kapaksa we sapedah motor oge ditungtun jeung didorong. 
| sundaonline.com

”Diibaratkeun mah, kawas tumpak kuda ngamuk, tumpak kandaraan di jalan Cisabuk mah, sabab adug-adugan kandaraan teh bawaning ku renjul jalanna,” saur Ibu Lina anu ngawarung di sisi jalan Kampung Cisabuk.

Ibu Lina teu apal iraha perbaikan jalan di Desa Cipelah bakal parat nepi ka Cisabuk. “Da ti kapungkur oge ngan kakupingna wungkul bakal ayana perbaikan jalan teh. Kanyataanana mah angger we jalan di dieu mah renjul,” Ibu Lina humandeuar. [] Endang GG