Di Jalan Logak Matak Bohak

Spanduk di Jalan Bhayangkara Kabupaten Bandung, Jumaah, 23 Januari 2015. | sundaonline.com

Hati-hati jalan berlubang! Eta eusi spanduk nu dipasang ku Polres Bandung teh ngajeblag di Jalan Bhayangkara Kabupaten Bandung. Duka geus sabaraha lila ngajeblagna eta spanduk teh. Kuring motretna pasosore, Jumaah, 23 Januari 2015.

Tangtu bae hade maksudna Polres Bandung masang eta spanduk di sisi jalan teh, ngarah jadi pangwawadi pikeun balarea. Da jeung enyana, sanajan Polres Bandung pernahna di sisi Jalan Bhayangkara, tapi sapanjang eta jalan teh henteu mulus kabeh. Sanggeus ngaliwatan Polres Bandung, mun asupna ti Jalan Raya Soreang Banjaran, urang bakal sidik kana lobana logak di sapanjang eta jalan. Malah parat nepi ka jalan perumahan Bumi Parahyangan Kencana jeung Sanggar Indah Banjaran logak-logakna teh. Padahal asa cik keneh eta jalan teh beunang ngomean.

Loba logak di Jalan Bhayangkara Kabupaten Bandung, Jumaah, 23 Januari 2015. | sundaonline.com

Numutkeun paniten urang dinya mah, lobana logak di jalan teh ku sabab kaguyur wae ku hujan. Tapi, cek urang dinya keneh, usum hujan oge ari kualitas jalanna alus mah moal gampang bocok jeung ngalogak jalan teh. Cindekna, pangwangunan infrastruktur—kaasup pangwangunan jalan—di urang masih ngabaekeun kana kualitas anu ideal.

Padahal geus loba kasus kacilakaan akibat tina jalan berlubang. Ngan anehna eta kasus teh henteu dijadikeun eunteung. Da mun dijadikeun eunteung mah, pamarentah bakal rikat ngomean jalan anu berlubang. Ku sabab loba logak, rea pengendaraanu mangpengkeun kandaraanana. Peta kitu teh apan kurang-kurangna mah matak picilakaeun.

Ku kituna, asa leuwih wijaksana seug masalah jalan berlubang teh geuwat diomean. Da spanduk anu dipasang ku Polres Bandung mah lain solusi pikeun ngungkulan jalan berlubang. Eta mah pangwawadi ngarah masarakat teu bohak ku lobana logak di jalan. [] Endang GG