Distributor MLM Ulah Nangtang Angin Puyuh

Minggu, 25 Januari 2015, Ibu Siti Umayah, warga Desa Nagrak Kacamatan Cangkuang Kabupaten Bandung, ngarasa untung teu indit ka pertemuan bisnis Multi Level Marketing(MLM) anu diayakeun di Riung Bandung. Mun tea mah nepi ka inditna, bisa jadi ripuh di jalanna. Atuh da apan dina poe eta teh aya angin puyuh. Ku rongkahna angin puyuh, di Kacamatan Pameungpeuk Kabupaten Bandung 56 bangunan rujad, dua imah ruksak parna. Masjid, madrasah, jeung 31 imah di Soreang oge dileled ku angin puyuh. Untungna henteu ruksak parna kawas nu di Pameungpeuk. Ngan tatangkalan mah nepi ka rungkad dihantem ku angin puyuh teh.

“Duh, mangkaning abdi sok ngangge jalan Pameungpeuk ari bade ka Bandung Wetan mah,” saur Ibu Umayah ka sundaonline.com, 27 Januari 2015. Ku kituna, eta Leader Nasional Komunitas Melia Sehat Sejahtera (MSS) teh peupeujeuh ka sakumna distributor MLM malar caringcing pageuh kancing, saringset pageuh iket, sabab cuaca ekstrim kiwari teu bisa dianggap enteng.

Ibu Umayah nyarita kitu dumeh salila ieu loba distributor MLM anu lebay. Pajarkeun teh, demi ngawujudna sukses, panas mah lain halangan, hujan oge lain halangan, malah badey jeung topan oge lain halangan. Ku jalma anu keyeng mah, halangan teh dianggap tangtangan. Padahal lamun ditangtang ku angin puyuh mah manehna can karuhan mampuh nandanganana. Bangunan anu tohaga wae bisa runtuh, atuh komo pantar pangawakan jelema.

Ku sabab kitu, Ibu Umayah umajak, dina sajeroning ngudag cita-cita teh kudu make logika. Ngagedurna sumanget geus sakuduna dina usaha mah, tapi ulah nepi ka leungiteun logika. Conto anu teu make logika nya eta distributor MLM anu maksakeun maneh indit make sapedah motor ka pertemuan bisnis anu jauh bari hujan angin dor-dar gelap, sarta banjir di jalanna. Jabaning peuting deuih. “Tah, nu kitu mah nyiar pipanyakiteun kasebutna,” saur Ibu Umayah bari tuluy netelakeun yen numutkeun BMKG, puncakna usum hujan teh ahir Januari nepi ka awal Maret dina taun ieu mah.  [] Endang GG