GPSS Taya Gunana?

Runtah mudal di GPSS Jalan Kopo Katapang Kabupaten Bandung mawa sareukseuk kana kaendahan lingkungan, Saptu, 10 Januari 2015. | sundaonline.com

Abong alam dunya tempatna dualisme, dina tiap gerakan geus tangtu nimbulkeun pro jeung kontra. Kawas dina perkara Gerakan Peduli Sampah Sabilulungan (GPSS) anu diayakeun ku Pamarentah Kabupaten Bandung. Masarakat teh aya nu pro aya nu kontra. Intina, GPSS geus ngahudang reaksi balarea dina perkara ngayonan runtah. Aya anggota masarakat anu sadar kana pentingna ngelola runtah, aya oge anu kalah ka sagenahna miceunan runtah ka GPSS.

Masarakat anu sadar henteu werat miceun runtah ka GPSS, sabab upama runtah nepi ka numpuk, ngahunyud, ngagunung, ngabalaan jalan raya, temahna mawa sareukseuk kana kaendahan lingkungan. Tapi nyatana memang kitu, GPSS geus mawa sareukseuk kana kaendahan lingkungan di Kabupaten Bandung. Hartina, loba keneh anggota masarakat anu tacan sadar kana pentingna ngamumule kabersihan jeung kaendahan lingkungan.

“Abdi mah sebel ka nu sok miceun runtah ka GPSS,” cek Nabila Az-Zahra (20 taun), di imahna Sanggar Indah Banjaran Kabupaten Bandung, Saptu, 10 Januari 2015. Naha bet sebel? “Atuh da mani asa disadiakeun wadah runtah, miceun runtah teh lung-lung we sagenahna pisan,” eta alumni jurusan Teknik Sipil Politeknik Bandung anu aktif di Komunitas Warga Peduli Lingkungan (WPL) Kabupaten Bandung teh mani ngageremet.

Pamiceunan runtah liar di Jalan Gandasari Kabupaten Bandung anu geus "dilegalisasi" jadi wadah runtah ku GPSS. | sundaonline.com

Pikeun balarea anu tacan sadar kana hartina GPSS mah pantes kana kituna. Hiji gambaran nyata nya eta GPSS anu di Jalan Gandasari Kabupaten Bandung. Samemeh pamarentah ngawangun GPSS, apan di dinya teh geus jadi tempat pamiceunan runtah anu sipatna liar. Loba warga Kabupaten Bandung anu ngaliwat make sapedah motor bari ngalungkeun keresek (baca: eusina runtah) ka palebah dinya. Sanggeus lila lumangsungna eta kabiasaan goreng patut balarea nu teu boga rasa tanggungjawab, pamarentah ujug-ujug ngadegkeun GPSS di palebah dinya pisan, atuh puguh we balarea anu tuman ngalungkeun runtah ka dinya teh asa dihempekkeun. Ku kituna, cek Nabila, GPSS teh tacan efektif pikeun ngatik balarea sangkan sadar kana pentingna ngamumule kabersihan jeung kaendahan lingkungan.

Sanajan kitu, Nabila paham, maksudna pamarentah ngayakeun GPSS teh hade, sangkan runtah henteu amayacak di mana wae. Ku ngalenyepan hartina oge apan sidik GPSS teh mangrupa uar pangajak pamarentah ka balarea sangkan paduli kana runtah dina raraga ngamumule kabersihan jeung kaendahan lingkungan. Ngan, ku sabab awam, loba anggota masarakat anu cigna ngamangpaatkeun GPSS jadi sasemet wadah runtah. [] Endang GG