Harga BBM Turun Deui, Tukang Bensin Humandeuar Deui

Luar biasa! Dina sabulan ieu (Januari 2015) pamarentah nepi ka dua kali nurunkeun harga Bahan Bakar Minyak (BBM). Bensin anu tadina Rp 8.500 per liter turun hargana jadi Rp 7.600 (1 Januari 2015). Tuluy tina Rp 7.600 turun deui hargana jadi Rp 6.700 (16 Januari). Atuh hartina dina jero sabulan teh geus dua kali rahayat Indonesia diuntungkeun ku pamarentah. Pikeun nu resep nyengcelengan mah, jadi leuwih gede nyengcelenganana. Geura etang we, Rp 8.500 dibantun Rp 6.700 sami sareng Rp 1.800 kauntunganana tina tiap liter bensin. Tuh, saban poe nyengcelengan Rp 1.800. Upama sabulan jadi Rp 54.000. Upama sataun jadi Rp 648.000. Eta teh lamun anggaran balanja bensinna saliter sapoe. Upama dua liter nya jadi dua tikel, jeung saterusna.

Tapi pikeun Bapa jeung Ibu Anton anu dagang bensin di Sanggar Indah Banjaran mah, turunna deui harga BBM teh kalah ka ngurangan kana batina. Basa harga bensin diturunkeun tina Rp 8.500 jadi Rp 7.600, batina Pa Anton Rp 900 tina per literna, da eta harga bensin anu Rp 7.600 teh bisa dijual Rp 8.500. Tapi sanggeus diturunkeun deui hargana jadi Rp 6.700 per liter, Pa Anton ngajualna jadi Rp 7.500. Hartina batina pikeun Pa Anton jadi Rp 800 tina per liter bensin. “Ku turunna deui pangaos bensin teh, pibatieun janten ngirangan,” saur Pa Anton humandeuar. “Tapi ketang sawios ah,” antukna Bapa sareng Ibu Anton pasrah, da saban jalma geus aya kulak canggeumna.

Duka kumaha nasib Pa Anton satuluyna upama bulan Pebruari 2015, atawa bulan-bulan sejenna pamarentah nurunkeun deui harga BBM. [] Endang GG