Harga BBM Turun, Tukang Bensin Humandeuar

Sanajan taya nu demo (unjuk rasa kabungah) ku lantaran pamarentah nurunkeun harga Bahan Bakar Minyak (BBM), dina enas-enasna mah warga masarakat pohara atohna. Lumayan tina harga bensin Rp 8.500 jadi Rp 7.600. Geus nolol tah hemat Rp 900. Upama tiap poe eta pangaji Rp 900 diteundeun dina cengcelengan, sabulan teh ngumpul jadi Rp 27.000. Upama sataun jadi Rp 324.000. Lumayan itung-itung embohna Tunjangan Hari Raya (THR). Kitu teh upama saban poe meuli bensinna ngan saliter. Upama dua liter mah nya kali dua we, jeung saterusna.

Bapa jeung Ibu Anton anu jualan bensin di Sanggar Indah Banjaran oge kacida atohna ku turunna harga BBM teh. Teu rek kitu kumaha, anu tadina bati tina per liter bensin ngan Rp 500 (baca: ti dituna Rp 8.500 dijual Rp 9.000), ayeuna mah jadi Rp 900. Naha? Hih, apan ti dituna—maksudna teh pom bensin—harga bensin Rp 7.600 per liter, dijualna ku Pa Anton Rp 8.500. Tuh, pan sidik batina Rp 900 per liter.

Ngan di satukangeun eta kabungah, Bapa jeung Ibu Anton oge rada humandeuar, sabab memeh harga BBM turun (1 Januari 2015) teh stok bensin di Pa Anton kawilang loba keneh. Lumayan tina per liter rugina Rp 500. Naha? Apan meunang meulina Rp 8.500 per liter, ari tempona dijual anu biasana Rp 9.000 jadi Rp 8.500. Tuh, pan jadi taya batian, malah pibatieunana leungit alias rugi.

Nu ngalaman nasib kitu teh lain Pa Anton wae. Loba tukang bensin anu humandeuar dina tempona harga BBM diturunkeun ku pamarentah.  [] Endang GG