Parasmanan Heula, Tuluy Walimahan

Bari ngantosan sumpingna Pa Naib, parasmanan heula. | sundaonline.com

Ahad, 1 Pebruari 2015, kuring kapeto jadi MC dina pernikahanana Neng Risma sareng Cep Andang Rahmat di Karawang. Acarana di bumi bae kalayan basajan. Sanajan kitu ari runtuyan acarana mah disusun kalayan rapih. Numutkeun jadwal mah, rombongan calon panganten pameget rek sumping tabuh 09.00, ngan walimahanana tabuh 10.00, da Pa Naib tiasana sumping tabuh sakitu. Ku kituna kuring indit ti imah, Banjaran Kabupaten Bandung, ka Karawang teh rada nyalse, da ayeuna mah make jalan tol ti Bandung ka Karawang paling lila dua jam mun teu macet mah.

Tabuh 08.00 kuring geus nepi di bumina Bapa Dede Suhada, nya eta anu kagungan alpukah hajat. Ngan langit ceudeum. Malah geus mimiti pras-pris cai ragragan ti langit. Untungna di buruan bumina Pa Dede Suhada geus ditudungan. Korsi plastik warna hejo geus dijajarkeun pikeun caralikna rombongan calon panganten pameget. Hanjakal, eta korsi teh teu kaihuan sadayana. Jadi upama hujan mah tangtu baseuh eta korsi teh. Alhamdulillah, rombongan calon panganten pameget tigin kana jangji. Pas tabuh 09.00 tos dugi ka buruanana bumi Pa Dede Suhada. Eta rombongan geuwat dibageakeun ku Ibu Tati, ibuna calon panganten istri katut kadangwargina. Tuluy dipernahkeun calikna dina korsi anu husus di jajaran payun.

Sesepuh ti rombongan calon panganten pameget ngiringan parasmanan. | sundaonline.com

Hujan ngabadagan. Sorana balap jeung instrumen lagu Sunda anu tadi mapag rombongan calon panganten pameget. Loba korsi anu baseuh da teu kaiuhan tea. Ku sabab kitu, sawareh tina eta rombongan teh dihiap ka lebet bumi. Sanggeus merenah, istrumen lagu Sunda teh dialonan nepi ka lesna teu kakuping.  Sanaos Pa Naib teu acan sumping, kuring mimiti muka acarana. Sugan dina waktosna sumping, Pa Naib kantun ngarahpalan. Pikeun muka eta acara, kuring ngahiap balarea pikeun sasarengan ngadawamkeun kalimah basmallah sangkan pernikahanana Neng Risma ka Cep Andang Rahmat lumangsung kalayan lungsur-langsar. Sabada dibuka, acara diteraskeun kana seren-sumeren anu dilaksanakeun ku sesepuhna calon panganten pameget sareng sesepuhna calon panganten istri.

Hujan tacan raat. Caina nyangkrung dina sisi-sisi terpal plastik anu dipake ngiuhan rombongan calon panganten pameget. Beuki lila eta cai teh ngagayot. Katangen sarerea anu ningal eta cai ngemu kapaur, inggis eta cai bahe. Mangkaning sesepuh anu nuju biantara oge aya di handapeun eta cai. 

Alhamdulillah, dugi ka rengsena biantara parasesepuh, si cai teh henteu bahe. Sanaos kitu, eta cai anu beuki ngagayot teh antukna mah dibahekeun ku patugas hajat. Enya bae cai teh muncrat, nyeretan balarea anu aya di dinya. Malah awak kuring mah nepi ka rancucut, da kuring ngajanteng di palebah dinya. Ku dibahekeunana eta cai, atuh buruan anu diiuhan ku terpal oge jadi becek, caina nyangkrung kawas cileuncang. Puguh bae salila menerkeun cai anu geus ngagarayot mah acara teh kandeg heula. Untungna hadirin angger tenang. Katingali dina hape, harita waktu geus nuduhkeun tabuh satengah sapuluh. Hartina aya keneh lolongkrang satengah jam deui kana sumpingna Pa Naib teh.

Sarengsena menerkeun eta cai, kuring umajak deui ka hadirin pikeun tuluykeun acara, nya eta asup kana acara seserahan. Beres seserahan, kana tabuh sapuluh teh rada lila keneh. Pa Dede Suhada usul ka kuring sangkan hadirin sina parasmanan heula bari nungguan sumpingna Pa Naib. Sanajan teu luyu sareng runtuyan acara—da ari kedahna mah parasmanan teh sarengsena walimahan, kuring nurut bae ka nu kagungan alpukah hajat. “Di dieu mah teu aneh parasmanan bari ngantosan sumpingna Pa Penghulu teh,” saurna deui mancegkeun hate kuring.

Pa Nandang, sesepuhna calon panganten istri oge satuju kana usulna Pa Dede Suhada. “Nuhun-nuhun Pa Penghulu sumpingna tepat waktos, kumaha upami ngaret?” saurna. Kuring unggut-unggutan. Ongkoh deui ku usum hujan sareng tiris mah peujit teh sok gampil kukurubukan. 

Lagu Sunda teh disetel deui, ngiringan hadirin anu nuju parasmanan. Hujan can raat keneh wae. Sisi-sisi terpal oge geus tinggarayot deui. Nepi ka tabuh sapuluh, Pa Naib tacan sumping. Katingali, hadirin nu tos taruang teh elekesekeng. Angot calon pangantenna mah. Nepi ka tabuh satengah sabelas oge Pa Naib tacan sumping. Duka ku naon. Duka sibuk ngarahpalan di tempat nu sanes, duka pedah kapegung ku hujan ageung.

Waktu geus nuduhkeun tabuh sabelas. Hadirin beuki elekesekeng. Pa Naib tacan wae sumping. Antukna parasesepuh barempug. “Urang tikahkeun we ayeuna, sawios teu ku Pa Naib oge,” saur Pa Nandang, sesepuh ti calon panganten istri. “Da anu ngasahkeun pernikahan mah wali sareng saksi. Peryogina Pa Naib ti KUA mah kanggo urusan catatan sipil,” saurna deui.

Ngan teu kebat eta rencana teh, lantaran meh tabuh satengah dua belas Pa Naib sumping. Lagu Sunda anu sorana balap jeung sora hujan dipareuman. Calon panganten pameget katut parasepuhna ngariung di lebet bumina Pa Dede Suhada pikeun ngalaksanakeun akad nikah. Geuning teu lami akad nikahna teh. Samemeh adzan lohor oge tos rengse walimahan teh. Geuwat bae kuring mungkas acara, umajak ka hadirin pikeun ngadawamkeun kalimah hamdallah.

Tos kitu mah, hujan keneh oge hadirin bubar, taya deui acara parasmanan. [] Endang GG