Runtah Lir Emas nu Kalintang Gede Ajenna

Pa Yoga

Tong sagawayah miceun runtah. Lain ku lantaran matak pigorengeun kana lingkungan, tapi saestuna runtah teh lir emas anu mangrupa barang anu kalintang gede ajenna. Kitu saur pupuhuna Komunitas Warga Peduli Lingkungan (WPL), Bapa Soenardhie Yogantara, basa ngawangkong jeung sundaonline.com di sekretariatna Jalan Bojongbuah Katapang Kabupaten Bandung, sawatara waktu ka tukang.

Ku sabab lir emas tea, saur Pa Yoga—kitu landihanana Bapa Soenardhie Yogantara—hadena runtah tong dipiceun. Runtah anu aya di imah teh dipilah, nu organik jeung nu anorganik dipisahkeun, pon nyakitu runtah B3 (Bahan Berbahaya dan Beracun). Mun geus dipilah, eta runtah diolah, dikokolakeun sina jadi piduiteun. Lain sisiwo, pikeun anu paham mah, runtah teh bisa jadi sumber panghasilan. 

Runtah organikbisa jadi kompos. Ari kompos teh apan alus pikeun tatanen. Runtah non-organikkayaning kertas, plastik, logam, botol, jeung sajabana, upama digundukkeun bisa dijual ka bandar rongsokan anu beh dituna bakal didaurulang. Pon nyakitu runtah B3 kayaning silet, jarum urut suntikan, batu batre, bohlam, beling, bahan kimia, jeung sajabana, bisa dijual ka bandarna. Hartina runtah teh ngandung ajen piduiteun. Ku kituna, kacida lebarna seug runtah dipiceun ka mana wae. “Ku margi ngandung ajen ekonomis, saena runtah di bumi teh dikokolakeun supados janten piartoseun,” saur Pa Yoga kalayan daria.

Eta konsultan lingkungan anu tos ngalanglang buana teh netelakeun yen di nagara-nagara maju mah runtah teh geus jadi urusan balarea. Lain pamarentah wae anu boga kawajiban ngurus runtah teh. Warga masarakat oge boga kawajiban anu sarua dina urusan ngokolakeun runtah. Ku sabab kitu pamilahan runtah nu aya di imah geus jadi kawajiban tiap warga. “Ku cara kitu, tangtu wae, runtah moal ngahunyud di mana wae, moal pabalatak di jalan, moal metet di solokan, moal ngotoran cai walungan, moal nyambuangkeun bau busuk, moal jadi masalah sosial anu krusial, lantaran sual runtah tos kakenyed ku warga masarakat di bumina sewang-sewangan,” saur Pa Yoga teu petot-petot ngahiap ka saban warga pikeun mirosea kana lingkunganana. [] Endang GG