Runtah Ngahunyud di Cibaduyut

Runtah ngahunyud di Jalan Terusan Cibaduyut Bandung, Rebo, 21 Januari 2015. | sundaonline.com

Rebo, 21 Januari 2015, sundaonline.comngulampreng ka Jalan Terusan Cibaduyut Bandung. Geuning ieu jalan anu kaceluk ku industri sapatuna teh masih dimomorekeun ku balarea.  Buktina aya keneh solokan jeung bahu jalan anu jadi pamiceunan runtah. Mani ngahunyud runtahna oge, malah leber meh ngabalaan badan jalan.

Wani nuding balarea anu miceun runtah ka dinya teh, awahing ku bingung kudu nuding saha saenyana, da piraku kudu nuding camat, lurah/kades, atawa aparatur daerahna mah. Moal enya aparatur daerah resep miceun runtah ka jalan mah. Geus puguh apan ku metetna runtah dina solokan teh bisa ngabalukarkeun banjir upama usum hujan mah. Ku ayana banjir, jalan anu kualitasna goreng matak gancang ngalogak. Ku banjir jeung ngalogakna jalan geus pasti nimbulkeun si komo lewat, nya eta macet tea.

Runtah metet dina solokan. Meujeuhna rek banjir oge. | sundaonline.com

Bet ku runtah nu ngahunyud oge geus ngabarubahkeun nu lalar liwat ka eta jalan. Angot pejalan kaki mah, beuki teu tumaninah bae ku ayana eta tumpukan runtah teh. Eukeur mah eukeur di palebah dinya taya trotoar pikeun pejalan kaki.

Atuh saha nu sok miceun runtah kana solokan teh? Taya saurang-urang acan anu daek ngaku atawa mere pituduh. “Saha deui atuh upami sanes balarea anu teu gaduheun rasa tanggungjawab mah,” cek warga di dinya anu narah disebut ngaranna. [] Endang GG