Runtah Tong Dipiceun!

GPSS teu jadi solusi pikeun ngungkulan runtah. | sundaonline.com

Nepi ka 30 Juni 2016 mah warga Kabupaten Bandung ngarasa reugreug, lantaran Tempat Pembuangan Sampah (TPS) Babakan masih bisa dipake nampung runtah. Ngan sabada liwat tina waktuna kumaha? Lebah dieu loba anggota masarakat Kabupaten Bandung anu guligah. “Enya, atuh ka mana engke miceun runtah sanggeus TPS Babakan ditutup?” cek warga masarakat kaasup warga Desa Ancol Mekar, Desa Babakan, jeung Desa Rancakole, anu harita (1 Januari 2015) geus ngablokir TPS Babakan awahing ku bosen ngangseu bauna runtah ti taun 1992.

Rupa-rupa ideu jebul di masarakat pikeun ngungkulan runtah. Ngan umumna mikiran runtah anu aya di imahna sewang-sewangan. Ku sabab kitu mikirna oge jang kapentingan sorangan bae. “Ah, hese-hese teuing mah alungkeun we runtah mah ka Citarum,” cek warga anu cicing di sisi Citarum.

“Hih, ulah miceun runtah ka Citarum, pibahayaeun eta teh!” tempas warga nu lianna bari tuluy nyebutkeun yen miceun runtah mah kana wadah runtah GPSS (Gerakan Peduli Sampah Sabilulungan) we. Apan meureun nu matak Pemkab Bandung ngayakeun GPSS di sisi-sisi jalan teh ngarah warga masarakat miceun runtahna ka dinya.

“Tapi kumaha lamun runtah di tiap GPSS mudal ka jalan?!” aya warga nu manghariwangkeun kana ayana GPSS.

“Matakna, hadena mah runtah di imah teh ulah dipiceun,” cek Warga Peduli Lingkungan (WPL) anu dipupuhuan ku Soenardhie Yogantara alias Pa Yoga basa ngawangkong jeung sundaonline.comdi sekretariatna, Jalan Bojongbuah Kabupaten Bandung. [] Endang GG