Taun Anyar Riweuh ku Runtah, TPS Babakan Diblokir

Asup kana taun anyar, 1 Januari 2015 teh warga Kacamatan Soreang, Banjaran, Cangkuang, Katapang, jeung sabudeureunana mah kalah ka guligah. Kumaha teu rek kitu, da kabejakeun runtah di Kabupaten Bandung moal diangkut, sabab Tempat Pembuangan Sampah (TPS) Babakan nu geus jadi andelan masarakat Kabupaten Bandung ti taun 1992 teh diblokir ku warga di sabudeureunana. Atuh kumaha?

Nya geus pasti bingung upama TPS Babakan saterusna diblokir mah. Ngan kitu kieuna mah ditangtukeun sanggeus warga di eta TPS tepung lawung jeung Bupati Bandung. Hartina, wayahna we runtah teh moal diangkut samemeh ngabuktina eta panglawungan.

Tada teuing numpukna runtah di Kabupaten Bandung upama teu diangkut mah. Angot dina usum hujan. Geus pasti kana bau busukna eta runtah teh. Mangkaning saban poena jumlah runtah di Kabupaten Bandung teh nepi ka 700 kibik. Ari kakuatan armada pengangkutan ukur 100 kibik. Geura pek pikiran ku balarea, cacakan dina kondisi normal sakitu lobana runtah anu teu kaangkut, atuh komo lamun nepi ka teu diangkut.

“Hah, aya-aya wae!” salasaurang warga Desa Nagrak Kacamatan Cangkuang Kabupaten Bandung kutuk gendeng. “Naha make jeung diblokir sagala TPS teh? Apan warga di dinya oge butuheun miceun runtah!” pokna deui nganaha-naha.

Untung nyarita kituna teh ti kajauhan. Mun seug kadengeun ku warga anu ngablokir eta TPS mah tangtu kana moal genahna. “Rek teu ngablokir kumaha da geus leuwih ti dua puluh taun kami ngemu kakesel teh. Samarukna genah cicing deukeut TPS teh? Pipanyakiteun mun hayang apal mah. Kami oge jelema, hayang we kawas masarakat nu lianna, jauh tina bau runtah, jauh tina pipanyakiteun. Kami hayang hirup jeung huripna, butuh lingkungan anu sehat, butuh cai anu beresih, ....” warga masarakat di Desa Ancol Mekar, Desa Babakan, jeung Desa Rancakole, anu kaganggu ku bau busukna runtah di TPS Babakan sosoak mudalkeun eusi hatena.

Akibat diblokirna TPS Babakan, runtah ngahunyud di mana-mana. Angot di sisi-sisi jalan raya anu aya GPSS (Gerakan Peduli Sampah Sabilulungan) mah, teu sirikna jadi panglumpatan warga Kabupaten Bandung pikeun ngalungkeun runtah ti imahna.  Pangna geuwat dialungkeun ka GPSS, lantaran warga teu kuateun ku bau runtah anu ngahunyud di hareupeun imahna. Ana kitu mah kaharti, paingan warga di sabudeureun TPS Babakan ngayakeun aksi protes ka Bupati, sabab bau runtah di TPS tangtu kana leuwih bauna batan runtah nu ngahunyud di hareupeun imah.

Jadi, mun eta TPS ditutup, warga Kabupaten Bandung rek miceun runtah ka mana? Ka GPSS wae kitu? Lamun GPSS geus teu kuateun nadah runtah kumaha? Da piraku Kabupaten Bandung jadi lautan runtah mah. [] Endang GG