TPPAS Regional Legok Nangka, Pamiceunan Runtah Alternatif

Wakil Bupati Bandung, Bapa Deden Rukman Rumaji, basa ngariksakeun pangwangunan TPPAS Regional Legok Nangka Kabupaten Bandung, Senen, 26 Januari 2015. | sundaonline.com

Geus aya jalan kaluarna pikeun masalah runtah teh. Upama engke—sabada 30 Juni 2016—TPS Babakan nepi ka ditutupna, runtah di Kabupaten Bandung bakal diangkut ka Tempat Pembuangan dan Pengolahan Akhir Sampah (TPPAS) Regional Legok Nangka anu pernahna di wewengkon Nagreg Kabupaten Bandung.

Upama dibandingkeun jeung legana lahan di TPS Babakan, legana lahan TPPAS Regional Legok Nangka mah pohara legana, nya eta 74,6 hektar. Atuh pikeun warga Kabupaten Bandung bakal kacida laluasana miceun runtah ka dinya? Henteu kitu, da TPPAS Regional Legok Nangka mah milik warga masarakat Jawa Barat, lain milik warga masarakat Kabupaten Bandung wungkul.

Pangwangunanana geus dimimitian ti taun 2011. Numutkeun rarancang agenda kagiatanana mah TPPAS Regional Legok Nangka baris bisa dipakena teh taun 2016. Tapi, basa diriksakeun ku Wakil Bupati Bandung, Bapa Deden Rukman Rumaji, TPPAS Regional Legok Nangka can pasti bisa dipake taun 2016. Jadi atuh iraha bisa dipakena? “Amisna Januari 2017, paitna Januari 2018,” saurna ka parawartawan sabada nampa katerangan ti Kasi Perencanaan Badan Pengelola Sampah Regional Legok Nangka, Bapa Budi Anggriawan, di TPPAS Regional Legok Nangka Kabupaten Bandung, Senen, 26 Januari 2015.

Budi Anggriawan nuju maparin katerangan ka Wabup Bandung, Deden Rukman Rumaji.
| sundaonline.com

Aeh naha bet meral kitu waktuna? Hih, apan dina prakna mah teu gampang ngawangun TPPAS Regional Legok Nangka teh. Saur Pa Budi ka Pa Deden anu dibandungan ku Pa Cendra Tresnayadi, Kepala Bidang Kebersihan Kabupaten Bandung, dina prosesna pangwangunan TPPAS Regional Legok Nangka teh henteu mulus ngaguluyur sakumaha anu geus diagendakeun, lantaran loba rambat kamalenna, di antarana nya eta masalah lahan. Tina 74,6 hektar lahan anu diperelukeun pikeun TPPAS Regional Legok Nangka teh masih aya 16 hektar anu can disertifikatan. Hal ieu kajadian ku sabab ayana masalah dina pembebasan lahan carik milik desa.

Sanajan kitu, ari pangwangunan jalan beton di TPPAS Regional Legok Nangka anu panjangna 3 kilometer mah geus meh rampung. Urang sabar bae ngadagoan kelarna eta “wadah runtah” anu meakkeun waragad milyaran rupiah tina APBN jeung APBD Jawa Barat. [] Endang GG