TPS Babakan Dibuka Deui

ilustrasi

Alhamdulillah! Warga Kabupaten Bandung ngarasa ngemplong sabada ngadenge TPS Babakan geus meunang deui dipake pikeun nampung runtah. Pangna bisa kitu, sabab warga masarakat di Desa Babakan, Desa Ancol Mekar, jeung Desa Rancakole, geus patepung lawung jeung Wakil Bupati Bandung, Bapa Deden Rukman Rumaji, Kemis, 8 Januari 2015. Hartina eta warga masarakat geus nedunan jangjina.

Ngan, cek warga masarakat anu diwakilan ku Yedi Irwandi, dibukana eta TPS teh lain pikeun salilana, tapi ngan hiji satengah taun, nya eta nepi ka tanggal 30 Juni 2016. Sanggeus eta mah duka teh teuing.

Intina mah angger, warga masarakat anu keuna ku hawa bauna Tempat Pembuangan Sampah (TPS) Babakan midangdam rehabilitasi lingkungan, perbaikan infrastruktur, kasehatan, cai anu bersih, sarta pengelolaan runtah. “Jadi, kasempetan hiji satengah taun mah minangka kaleahan manah warga we,” cek Yedi ka Wakil Bupati di hareupeun Kepala Dinas Perumahan Tata Ruang dan Kebersihan Erwin Rinaldi, Kabid Kebersihan Cendra Tresnayadi, Kades Babakan Dadang Holiludin, Kades Ancol Mekar Empat Patimah, Ketua Karang Taruna Kacamatan Arjasari Gumilar Guntur, jeung puluhan warga.

Ku sabab ngan saheulaanan bisana make eta TPS, tangtu bae Pamarentah Kabupaten Bandung kudu tihothat ti ayeuna pikeun ngayakeun TPS alternatif sabada TPS Babakan bener-bener ditutup ku warga masarakat di sabudeureunana. [] Endang GG