Trotoar Lain Tempat Neundeun Mobil

Keur trotoar ngan sauted teh hayoh deuih dipake neundeun mobil, di Jalan Gandasari Warunglobak Kabupaten Bandung, Kemis, 22 Januari 2015. | sundaonline.com

Karunya nasib pejalan kaki mah. Lain bae ku pamarentah kurang dipirosea, dalah ku sasama rahayat oge henteu direret. Teu rek nyebut kitu kumaha, atuh da isuk keneh, Kemis, 22 Januari 2015, geus aya nu pikasebeleun. Di Jalan Gandasari, deukeut Apotek Gandasari Warunglobak Kabupaten Bandung, aya mobil biru keur ngajeten di trotoar. Bangun nu tumaninah cicingna eta mobil di trotoar teh. Samarukna moal ngabarubahkeun balarea. Sidik trotoar teh sarana umum pikeun balarea anu laleumpang. Budak PAUD oge apaleun trotoar mah lain pikeun neundeun mobil. Tong boro mobil, apan sapedah motor oge teu kaci make trotoar. Malah tukang dagang oge alusna mah henteu nyabot trotoar.

Atuh paingan pamarentah bangun nu asa-asa nyieun trotoar di Jalan Gandasari teh, da meureun inggis dipake neundeun mobil ku jalma-jalma anu teu apal kana tata-titi.

Cek sababaraha urang warga nu keur laleumpang di eta trotoar, nu neundeun mobil di trotoar teh jalma nu teu nyakola. Keur mah eukeur trotoar di Jalan Gandasari teh masih sauted—da ngawangun trotoarna teh kawas nu ngabuntut bangkong, eh kalah ka disorobot ku nu neudeun mobil. Teuing kumaha eta pipikiranana anu neundeun mobil di trotoar. Mun tea mah manehna boga SIM (Surat Ijin Mengemudi), asa uyuhan make jeung lulus pikeun mibanda SIM.

“Hadena ku pulisi teh ditilang nu neundeun mobil di trotoar mah,” salasaurang pejalan kakingageremet. [] Endang GG