Bunda Susanti Ngadongeng di Kober Paud Nur Istiqomah

ilustrasi

Ngarah teu matak bosen dina kagiatan belajar-mengajar, oge bari sakalian silaturahmi, Kober Paud Nur Istiqomah , anu pernahna di Jalan Penclut Rancamanyar Kabupaten Bandung, tanggal 17 Maret 2015, ngayakeun acara “Budan Susanti Ngadongeng”. Ku kituna, aya lima Paud di lingkungan Desa Rancamanyar anu diondang ngaramekeun eta acara. “Alhamdulillah, tina lima Paud anu diulem, mung hiji anu teu tiasa sumping mah,” saur Ibu Iis Mulyani, Kapala Paud Nur Istiqomah ka sundaonline.com. “Kantenan we rame, da anu ngahadiran eta acara teh paramurid katut parasepuhna, parakapala Paud, sareng paraguruna,” saurna deui daria.

Dina eta acara katangen paramurid Paud mani saregep ngabandungan dongeng. Pon nyakitu nu jaradi kolotna ngarasa bungah diwurukkan ngaliwatan dongeng islami teh, bisa ngahudangkeun sumanget diajar maca Al-qur’an, cenah. ”Insya Alloh Paud abdi ge ka payun mah bade ngondang Ibu Ida Susanti kanggo ngadongeng,” saur Kapala Paud ti Bojongsayang ka sundaonline.com. 

Awahing ku resep, rengse acara ngadongeng aya murid Paud anu nanya, ”Bunda, iraha bade aya deui acara ngadongeng? Abdi mah resep.”

“Insya Alloh ka payun aya deui,” saur Ibu Iis Mulyani sabada ngadangu eta pananya muridna. Kituna teh bari tuluy nyalaman parakapala Paud anu hadir dina eta acara. 

Ibu Iis Mulyani netelakeun, samemehna, Kober Paud Nur Istiqomah kungsi sababaraha kali babarengan jeung Paud-Paud sejenna ngayakeun rekreasi bari ngojay di wisata kolam kabupaten Bandung. [] Ida Rukmana