Geus Cawadeun Deui Bae!

Geus sidik dilarang parkir, eh angger we bedegong, neundeun mobil di tempat anu dilarang. 
| sundaonline.com

Aya we cawadeun teh. Enya rek teu openan kumaha atuh da sidik cawadeun. Geus puguh apan di palebah dinya mah dilarang parkir, ari nyatana loba mobil anu cicing di palebah dinya. Tangtu bae lain salah mobil, tapi salah anu bogana atawa anu nyupiranana. Duka kumaha pangna bisa kitu. Piraku nu nyupiran atawa nu boga mobil teu apal kana rambu-rambu lalu lintas mah. Jabaning eta kajadian teh di hareupeun Polres Bandung deuih, nya eta di Jalan Bhayangkara Kabupaten Bandung, Senen, 2 Maret 2015.

Pantesna mah, jalan anu katempatan ku kantor pulisi mah jadi jalan percontohan, kaasup jadi conto dina hal katartiban atawa kadisiplinan berlalu-lintas. Badegna masarakat teh geus ngabatu kawasna mah, da geuning ngarempak aturan hareupeun kantor pulisi oge taya kasieun. Duh, aya ku hese nya nanjeurkeun aturan! [] Endang GG