Juragan Lebe Nganjuk Duit

Dina jero taun lilikuran, salah saurang tatangga bapa kuring teh jeneng Lebe. Sakanyaho, lebe teh nya eta amil, nu kapapancenan nguruskeun hal-hal nu aya patalina jeung agama Islam di desa. Ari dangdanan Juragan Lebe teh harita mah ilaharna disarung, dijas tutup, diiket jeung ditarumpah, pantes jeung beresih bae. Istrina saurang, tegep, dangdananana disamping kebat, dikabaya, digelung jeung diselop. Aya anakna saurang awewe leutik keneh....

Jeneng Lebe teh harita mah pada ngajenan pisan ku rayat sadesa, komo ku nu deukeut ka imahna mah, saperti tatangga-tatangga jeung bapa kuring harita kacida hormatna ka Juragan Lebe teh. Komo nu baroga anak awewe mah, sieun engkena teu dipanguruskeun ku lebe dina ngawinkeun anakna, cenah. Atuh jelema-jelema nu aya umur sieun bisi engkena teu dipanguruskeun ku lebe dina dikurebkeunana, cenah deuih.

Dina hiji poe istri Juragan Lebe teh datang ka imah, disanghareupan ku indung kuring. Poko maksudna mah rek nginjeum duuit saringgit (f 2,50), cenah keur kaperluan ka nu hajat, dionadang ku nu rek ngawinkeun di desa sejen saampar samak. Atuh golosor saringgit ti indung kalawan disaluyuan ku bapa....

Ari lebah rek naurna, pleng saminggu dua minggu nepi ka sabulan dua bulan, lebeng bae, didago-dago weleh teu jol bae panaurna teh. Atuh keur nagihna, bapa jeng indung teh nitahna ka kuring, anak lalaki nu panggedena. Kuring teu loba omong teu ngarasa hoream. Barang datang mimiti ka Juragan Lebe mah, istrina mayar lima ketip (f 0,50). Heuleut dua minggu datang kadua kalina, golosor lima ketip deui. Datang nu katilu kitu keneh mere lima ketip. Ninggang kana bulan nu kadua minggu nu panutup, sesa hutangna teh tinggal saperak (f 1,--). Cek bapa jeung indung teh, geus bae entong nagih deui ka Juragan Lebe. Atuh kuring oge senang teu kudu nagihan deui mah.

Parandene kitu, ku kuring teu weleh diarep-arep, sugan we Juragan Lebe hideng datang sorangan mayar sesana nu saperak deui. Tapi weleh, nepi ka kiwari pisan, lebeng we, teu basa teu carita.... saperak harita teh mun dibeulikeun kana beas meunang 15 leter. [] S. Sauni