Kades Rancamanyar Bakal Nyieun PD Runtah

Ilustrasi

Masalah runtah teu bisa dibaekeun. Masarakat jeung pamarentah kudu sabilulungan pikeun ngungkulanana. Angot runtah anu aya di wilayah Desa Rancamanyar Kacamatan Baleendah Kabupaten Bandung. Dihenteu-henteu oge Desa Rancamanyar teh bisa disebutkeun jantungna Kacamatan Baleendah, sabab salila dalapan taun pangwangunan di Kacamatan Baleendah museurna di Desa Rancamanyar. “Tingal we, saban dinten jalan-jalan di Rancamanyar mah sakitu rame sareng padetna,” saur Pa Dadang Kamaludin, SE, Kapala Desa Rancamanyar ka sundaonline.com.

Eta desa anu ngawengku 20 RW teh mibanda jumlah penduduk nepi ka 430.000 jiwa. Tangtu wae jumlah pendudukna bakal terus nambahan, sabab loba warga Kota Bandung anu nyered meuli padumukan di wilayah Rancamanyar. Sarana umum di eta desa geus kawilang kumplit, kayaning Puskesmas, pasar, sakola, jeung tempat jajanan. “Pangwangunan jalan raya oge teras digederkeun,” pokna deui reueus.

Ku kituna lebar upama pangwangunan dicacadan ku amayacakna runtah. Jadi, pikeun ngungkulan masalah runtah teh, kasadaran masarakat dina perkara ngokolakeun runtah kudu dironjatkeun. “Ka payun mah, abdi bade ngadamel Peraturan Desa (PD). Sing saha wae anu kaperego miceun runtah lain dina tempatna, wayahna bakal ditibanan sangsi numutkeun eta PD,” saur eta Kades Rancamanyar anu lulusan ti Universitas Pasundan. [] Ida Rukmana