Keong Ceurik Balilihan

Geunjleung di leuweung Ganggong! Cenah aya “pembalakan liar”, hektaran kebon hui dibabad ti mimiti pucuk, daun, areuy nepi ka beutina beak sapisan. Ajag nu kapeto jadi kaamanan leuweung, rikat nyusud bangsatna. Bubuhan seukeut ambeuna, teu kungsi lila nu boga dosana teh kacerek. Teu pira keong…! Sato nu ngarayap lalaunan tea.

Keong diguliksek bari sakapeung disintreuk. Nu tadina kekepehan teu ngaku teh, tungtungna mah balaka. Enya cenah manehna nu ngaruksak kebon hui teh. Teu diengkekeun, keong dijagragkeun ka pangadilan leuweung, bari dilengkepan ku barang bukti ; daun hui sabebed, meunang nyita ti imah keong. Putusan pangadilan leuweung, keong dihukum saumur hirup. Nya keong teh digebluskeun ka pangberokan. Dibui sapaehna…

Di pangberokan keong ceurik balilihan. Ras kana nanasiban nepi ka kudu ngalaman kitu. Nu jadi nyeri lantaran teu rumasa boga salah. Ngaku soteh bubuhan we teu kuat ku panyiksa ajag. Keong nalangsa asa teu boga panyalindungan. Cenah abong ka sato laip hukum teh bet “tebang pilih”. Bareto basa tetengek paeh katincak ku badak, badak teh teu dikukumaha. Ceuk ajag harita, da teu kahaja. Beda deui jeung basa lalay maling jambu nu Dewa Leuweung, lalay pada ngepuk nepi ka paehna. Teu jadi masalah…

Ret ka gigireunana, keong asa sirik. Pedah di pangberokan sejen mah teu kawas di pangberokan manehna. Teuing pedah sato gede meureun nu diberokna. Careuh sarua keur diberok. Tapi dipangberokan careuh mah ngeunaheun pisan. Teu siga-siga di pangberokan siga di sayangna bae. Malah mun di dunya manusa mah siga di hotel bintang tujuh meureun…

Perkara “pembalakan liar” nu sakitanana keong, jadi bahan carita di mana-mana. Wartawan leuweung teu bosen-bosen ngembarkeun eta kajadian. Komisi Hak Azasi Sato (KHAS) kahudang simpatina ka keong. Sok komo sanggeus sato-sato leutik “demo” ka Dewa Leuweung menta kaadilan. KHAS menta “kasus keong“ ditalungtik deui. Teu kaharti cenah, piraku sato leutik pantar keong bisa ngaludeskeun hui hektaran. Ongkoh pan keong mah paling ngadahar pucukna, kitu ge ukur sakumaha. Ari ieu beak ka beuti-beutina? Teu asup akal.

Maung milu aub kana panalungtikan. Abong ambeu maung mah leuwih seukeut, gorehel teh kapanggih, nu dicuriga teh bagong, salah sahiji pangurus di Leuweung Ganggong. Loba pisan buktina, antarana taneuh lidig tapak disungkuran, da nu sok sungkar sungkur kana taneuh mah pan bagong. Atuh der deui wae Leuweung Ganggong teh geunjeung. Kaharti cenah mun bagong nu boga dosana mah, da bagong mah memang hawek jeung kadedemes. Ku kituna nu demo menta bagong ditewak beuki mahabu di mana-mana. Tapi ajag teu gasik newak bagong, da cenah buktina can kuat.

Ngarasa kaancam bagong teu cicingeun. Geuwat menta tulung ka peucang nu kawentar pinter nyieun reka perdaya. Peucang kesit naker. Dibantuan ku kunyuk manehna pulang anting “ngalobi” ajag jeung pangadilan leuweung. Teu mubajir ketakna kitu teh. Kalayan teteg ajag nandeskeun yen bagong teu boga salah. Nu salah mah tetep keong.

Bagong bungangang atoh. Teu panasaran beak gede ge urut muruhan peucang jeung kunyuk. Keur nanjeurkeun komarana salaku sato gede, bagong malik teu suka ngalaporkeun maung ka pangadilan leuweung. Cenah dakwaanana: maung nyieun “ pencemaran nama baik”. Atuh maung teh kapaksa balewatangan. Ancamanana bisa dibui mun teu bisa ngabuktikeun kasalahan bagong.

Di pangberokan keong ngaheruk, asa pimanaeun meunang kaadilan. Perkara nu sarupa jeung manehna geus loba kajadian di Leuweung Ganggong. Putusan pangadilan, rata-rata nu disalahkeun teh sato leutik. Sato-sato gede mah sok bisa bebas. Teuing ku naon.

“Hukum di urang mah kawas bedog, ka handap seukeut ka luhur mintul…” ceuk tenggek basa besuk ka pangberokan. Keong kalah ka beuki ngaheruk, teu boga harepan bebas…… [] Mang Nanang