Korupsi di Leuweung Ganggong

Sasatoan di leuweung ganggong tingkaroceak alatan hese neangan dahareun. Leuweung nu sakitu legana teh karasa heureut euweuh keur sahuap sakopeun. Lain kadaharanana nu euweuh, tapi kabeh lahan di eta leuweung geus dipiboga ku sato-sato baradag. Jadi teu bisa kitu wae neang hakaneun.

Ceuk sakaol cenah kitu teh gara-gara pangurus di eta leuweung harawek. Ma’lum sato meureun teu nyaho di batal haram. Sasatoan badag saperti ajag, bagong, careuh, monyet, bayawak pahibut pa hayang-hayang jadi pangurus. Enya keur can jeneng mah harade pisan da hayang kapilih.

Sanggeus maranehna kapilih, tembong watek aslina. Nyaeta hawek, sarakah jeung licik. Lain ngurus leuweung ngarah pangeusina raharja, tapi mak-mak mek-mek mentingkeun dirina sorangan jeung balad-baladna. Atuh di leuweung ganggong teh harengheng ku masalah korupsi nu mahabu di mana-mana. Lain sato-sato badag wae nu korupsi teh, geus ngambah ka sato-sato leutik kayaning beurit, lalay, cucunguk, jeung sabangsana.

Caritana Dewa leuweung ihtiar ngabasmi koruptor. Nya ngangkat maung jadi purah newakan nu korupsi. Teu nyalahan, lantaran maung teh sato galak jeung kuat. Panonna awas, ambeuna seukeut, sihung jeung kukuna ranggeteng. Kabeh sasatoan nu aya di leuweung sieun ku manehna. Sakedapan korupsi teh rada ngurangan, najan henteu ari nepi ka euweuh pisan mah. Maung soson-soson digawena, rikat jeung tangginas ngabasmi sato-sato basilat.

Orokaya bagong, careuh, ajag, monyet jeung sato-sato nu sok korupsi jadi ringrang sieun katewak. Nya maranehna baradami kumaha carana ngalawan maung. Ceuk ajag mending gelutan. Tapi ceuk nu sejen ulah terang-terangan bisi disangka pro korupsi. Kungsi aya nu usul supaya menta ka Dewa ngaganti maung ku srigala. Tapi ahirna diputuskeun mending ku cara lantip, ambeh laukna beunang caina herang.

Dina hiji mangsa dak dumadak maung teh nyeri huntu. Teuing tas ngadahar naon. Saban poe gegerungan ngararasakeun huntu nyut-nyutan, komo palebah sihungna mah. Ajag kawas nu heueuh bela, maung teh dibawa ka tabib rek diubaran.

Ceuk tabib, “Ieu mah sihungna kudu dicabutan, lantaran koropok di jero. Mun diantep bakal tuluy nyeri jeung naratayan…”

Teu kuat ku nyeri, maung pasrah dicabutan sihungna. Malah jeung kuku-kukuna da eta cenah sok dipake ngorekan huntu, mawa jaram nu matak jadi nyeri huntu ge. Antukna maung teh lemor teu sihungan teu kukuan. Enya ari jadi cageurna tea mah.

Ti harita maung jadi kurang bangenan. Malah sato-sato galede mah jadi wani ngalawan. Naon sababna? Tuda ayeuna mah geus teu bahaya. Ukur gaurna wungkul, sakalieun ngerekeb teh teu bisa nyakar teu bisa ngagabreskeun sihung, da puguh geus dicabutan tea. Sato-sato nu sok basilat sarurak bungah. Maranehna ngarasa aman moal katewak.

Selenting bawaning angin, cenah nyeri huntuna maung teh balukar tina reka perdaya sato-sato curaling. Tangtu wae dina raraga ngalawan ku cara lantip tea. Ku kituna korupsi di leuweung ganggong teh teu leungit-leungit, malah beuki mahabu. Dewa leuweung teu bisa kukumaha. Nu jadi korban angger sato-sato laleutik…. [] Mang Nanang