Naskah Dalang di Kolong Gebog

Mun inget kalakuaan keur di SD matak hayang seuri sorangan. Abong kasebutna budak keneh, taya kasieun jeung sok hayang nyaho wae. Memang kuring ti kelas dua SD geus resep lalajo wayang, malah make jeung hayang jadi dalang. Ari balik ti sakola teh sok metik daun sampeu dijieun wawayangan, tuluy diigelkeun bari nejehan kaleng ngajrekjrek kawas dalang, di pipir imah nini anu panggung. Pok teh Aki sasauran, “Sujang, kade poho kana ngapalkeun, ulah katungkulkeun ku pangaresep. Barina oge keur naon jadi dalang, mun bisa mah cita-cita teh jadi insinyur, atawa dokter. Dalang mah ieuh boga panghasilan teh sapanjang aya nu ngondang manggung, mun taya nu ngondang nya moal bisa dahar.”

Teu ditolih eta kasauran Aki teh. Angger bae cita-cita teh hayang jadi dalang sohor. Matak mun unggal malem minggu sok tara kaliwat nyetel siaran wayang golek di RRI Bandung. Nu jadi indung mah geus nganyahokeun deui mun radio transistor cawang dibawa ka kamar pasti rek nyetel wayang. Bari gogolehean nungguan siaran wayang golek bari diajar ngadalang.

”Sujang gandeng ceuceuleuweungan bae, angguran mah ngapalkeun, da jeung kalah kumaha oge moal jadi dalang tanpa manjing guru mah.” Kadenge deui Aki sasauran. Tapi angger bae dina hate kuring kudu jadi dalang sohor kawas Abah Sunarya, Mama Elan Sulawisastra, atawa Apek Gunawijaya. Ngan kasauran Aki anu eta mah rada kapikiran. Tapi, naha mun teu manjing guru moal jadi dalang? Bakat ku hayang jadi dalang, unggal aya pagelaran dalang Abah Sunarya, kuring embung tinggaleun. Inget, harita kuring keur nyeri panon lalajo pagelaran Abah Sunarya di hareupeun kampus ITB, medar lalakon “Kangsa Adu Jago”. Loba nu lalajona. Ngan, di tengah peuting kuring teu kuat ku pitunduheun, sup we kuring asup ka kolong panggung ngabeulitkeun sarung kana panggung, sare ngagulantung.... Ari barang hudang ningali kaluar nu lalajo geus areuweuh.... Di luhur panggung wayang nu ngajajar na gebog keur diasup-asupkeun ka na kotakna.

”Jang, lalajo teh kasarean?“ tukang goong nanya.

”Sumuhun Mang, tadina mah hayang lalajo nepi ka rengse, hayang sasalaman jeung Abah Sunarya.... Eh, Abahna kaburu balik. Mana kitu ge meureun can diparengkeun sasalamanan.…” walon kuring. Saminggu ti dinya aya pagelaran wayang anu maneuh di Taman Lalulintas Bandung. Ti imah kuring ngahaja leumpang make calana sontog. Ceuk beja dalangna kasepuhan. Datang ka Taman Lulintas nu lalajo geus pinuh. Tapi kuring seseledek, da hayang lalajo di hareupeun panggung ngarah apal kumaha prak-prakanana ngadalang. Atuh da panasaran, naha ari dalang bet capetang, norolang upama keur ngajekjrek medar carita teh.

Disidik-sidik, ditengetan, geuning ki dalang teh bari maca. Naha dumeh dalangna geus kolot kitu? Pikiran galecok sorangan. Katingali ki dalang keur rada nundutan. Bakating ku hayang nyaho, eta naskah lalakon wayang di kolong gebog teh dicokot ku kuring, diasupkeun kana jero baju. Ti dinya mah geuwat kuring balik ka imah, ngarasa atoh boga naskah lalakon wayang. Teu apal kumaha ketakna ki dalang sabada naskahna leungeit—dicokot ku kuring. Ngan, ceuk tatangga nu harita lalajo beulah tukang, harita keneh oge pagelaran wayang teh ditutup ku lawang sigotaka. [] Ida Rukmana