Nu Bogana Niup Piriwit, Sora Manuk Beuki Tarik

Pasanggiri "Burung Berkicau" di TVRI Jabar Banten. 

Basa TVRI Jabar-Banten milangkala nu ka 28 taun, aya sawatara acara anu digelar. Salah sahijina nya eta acara pasanggiri “Burung Berkicau”. Mani rame eta acara teh. Leuwih ti saratus urang pesertana (tangtu wae manuk nu jadi pesertana). Sapuluh di antarana eta manuk nu dikurungan teh dibawa ku nu bogana, digantungkeun kana tempat nu geus ditangtukeun ku panitia, pikeun diadukeun sorana. Aya opat juri nu rek meunteunna. Enyaan manuk teh mani palinter. Basa ku juri dihempekkeun sina disada teh manehna nyoara, disada patarik-tarik, paalus-alus sora. Di luar pager loba nu lalajo, kaasup nu baroga manukna. Sangkan si manuk nu keur pasanggiri sumanget, nya nu bogana nyumangetan ku rupa-rupa cara. Aya nu nyumangetan manukna gogorowokan bari nyebut ngaran landihanana eta manuk, aya oge anu niupan piriwit bari leungeunna pepeta. Dikitukeun teh si manuk beuki tarik sorana. Tapi aya oge manuk anu cicing bae jiga nu capeeun.

”Tuh tingal manuk itu anu hade pisan mah,” ceuk hiji ibu bari nunjuk kana manuk nu baceona jiga nu keur dzikir. 

Rupa-rupa manuk nu dilombakeun teh, aya manuk anis HBC, ciblek favorit, muray, kenari, pentet, kocer, jenggot, jeung sajabana. 

”Kang punten ulah ngahalangan, manuk abdi teu katingal,” ceuk nu boga manuk ka hiji juri. 

Pikeun manuk nu sorana alus, para juri nancebkeun bandera di handapeun manuk nu ngagantung.

Nu milu lomba Burung Berkicau teh ti rupa-rupa daerah. Aya nu datangna make mobil, aya oge nu make motor. Tapi, karunya nu make sapedah motor mah. Tumpak motor mah si manuk kagojlog-gojlog. Ku sabab kitu tempona milu pasanggiri teh geus capeeun manten. Eta manuk nu capeeun teh tungkul bae. Kantenan we nu bogana oge jadi sedih. Manuk nu dibawa kana mobil oge aya nu capeeun. ”Ah, sawios kawon oge, etang-etang pangalaman bae, da teu matak rugel, mung mayar kanggo daptar wungkul dua puluh rebu. Hikmahna we nu utami mah janten nambihan baraya,” ceuk lalaki tengah tuwuh bari mawa manuk nu rek diteundeun kana mobil bak. Rek geuwat balik cenah bisi kaburu hujan. [] Ida Rukmana