Pangberokan Kosong Molongpong

Ti saprak nyeri huntu, maung teh jadi teu bangenan. Kukituna korupsi di Leuweung Ganggong mahabu deui. Malah nu tadina henteu wani korupsi ge lalanyahan jadi koruptor. Dewa Leuweung nyieun kawijakan. Keur ngabantuan maung nya diangkat ucing, pedah sarua ngan beda gede leutikna wungkul. Ucing teu wudu oge tangginas jeung rikat, pangpangna dina ngambeu sato-sato nu korupsi. Ku kituna loba sasatoan nu dicirian ku ucing.

Harita, Dewa Leuweung rek ngaganti pangurus kaamanan jeung hukum ( kam-kum ), lantaran masa bakti kam-kum nu ayeuna geus beak. Numutkeun undang-undang di Leuweung Ganggong, urusan kam-kum teh dibagilirkeun diantara sato-sato nu garalak. Upamana taun mangkukna maung. Tuluy diganti ku singa. Ayeuna nu keur mancen teh ajag. Jadi nya ajag ieu nu rek diganti teh.

Duka pedah hade gawena atawa alesanana kumaha, ku Dewa Leuweung dibewarakeun yen urusan kam-kum teh rek dipasrahkeun deui ka ajag. Para sato saperti bagong, careuh, lasun,bayawak, monyet, beurit, aratoheun ngadenge bewara kitu teh. Geus puguh ari ajagna sorangan mah. Kalungguhan jadi pangurus kam-kum memang loba dipikahayang ku sato-sato di Leuweung Ganggong. Naon sababna? Kawasa, dipikasieun jeung babari ngarah dahareun ..! Pang-pangna lantaran bisa nyalindung di satukangeun undang-undang.

Kocap ajag teh geus jigrah bakal jeneng deui. Na atuh kurunyung teh ucing laporan ka Dewa Leuweung yen ajag kabaud kana urusan basilat. Atuh Dewa Leuweung teh kandeg teu wani mutuskeun enya henteuna ajag jadi kam-kum deui. Ajag tangtu wae ambek ka ucing, boga rasa dihalangan. Sato-sato nu ngarojong ajag usul ka Dewa Leuweung supaya laporan ucing ulah didenge. Malah aya demo sagala nu ngarojong ajag. “ Geuwat ajag istrenan...!” cenah.

Kulantaran kawasa tea - pedah keur jeneng kamkum – ajag teh newak ucing. Ucing didakwa ngalanggar undang-undang leuweung nomer saanu. Malah lain ucing wae, kaasup maung jadi sakitan. Ucing jeung maung digebluskeun ka pangberokan. Keur nguatkeun alesan, ajag balewatangan ka pangadilan Leuweung Ganggong. Putusan ti pangadilan : ajag dianggap teu boga dosa, alias bersih. Ku kituna ajag bungangang deui, gede harepan angger jadi kam-kum.

Orokaya balukar putusan eta, sato-sato nu geus jadi sakitan, atawa anu geus puguh cicing di pangberokan asa dibere jalan. Atuh rabul ka pangadilan menta panalungtikan deui, Pe-Ka tea mun di dunya manusa mah . Tangtu wae harepanana sugan meunang kawas ajag. Balukarna pangberokan teh jadi kosong euweuh pangeusina. Sabalikan di pangadilan ngaliud sato-sato nu rek balewatangan.

Anu lieur tangtu wae hakim leuweung. Sahanteuna kudu maraton ngayakeun sidang, puguh sakitu lobana nu hayang balewatangan teh. Tapi sabalikna, peucang mah malah bungah kabanjiran order. Pan ceuk dina dongeng buhun ge peucang teh kawentar pinter loba akalna. Peucang nu tapis dina reka perdaya, kapeto ku itu - ku ieu jadi panasehat hukum. Atuh peucang mah ceuyah da meunang bayaran ti ditu ti dieu.

Salian ti peucang nu barungah teh sipir-sipir di pangberokan. Bisa hees beurang peuting ayeuna mah da euweuh nu kudu dijaga. Pangberokan kosong molongpong. Orokaya sasatoan di Leuweung Ganggong jadi risi deui. Nu basilat beuki loba. Nu curaling beuki wani. Iraha cenah Leuweung Ganggong rek bersih tina korupsi? Euweuh nu bisa ngajawab, euweuh nu bisa ngajamin….. []  

Mang Nanang