Tawadu ka Alloh SWT

Jeung sing saha anu sumerah diri ka Alloh, turta maraneh ngalampahkeun kahadean, nya sabenerna manehna geus ngeumbing kana tali anu pageuh, jeung kagungan Alloh akibatna sagala perkara teh. (Alquran Surat Lukman : 22)

Intina eta Pangandika Alloh teh nguarkeun pangajak sangkan urang salaku manusa mibanda sikep tawadu, nya eta sumerah diri kana pangersa Alloh SWT, kalayan tetep husnudon (hade sangka) sok sanajan keur nyorang katunggaraan. Jadi tawadu teh lain kancahan tina "tara mawa duit" sakumaha anu sok disebutkeun ku jalma nu tukang heureuy.

Ari nu dimaksud sumerah diri nya eta ngalampahkeun awak sakabehna ka Alloh, sarta yakin Anjeunna baris maparin nu panghadena pikeun manusa. Sumerah diri lain hartina mopohokeun usaha, tapi tetep ihtiar sakuatna kamampuh nu aya. Gambaran nu sumerah diri lir nu ngagantungkeun jiwa ka Alloh, tapi sukuna napak kana taneuh.  Kitu peta teh kasebutna jalma nu tawadu, ihlas nampa sagala katangtuan—musibah  atawa kanikmatan—nu dipilih ku Alloh. Jalma nu sumerah diri salawasna tara goreng sangka ka sasama. Dirina yakin yen katangtuan naon bae nu ditetepkeun  mangrupa pilihan anu hade, luyu jeung naon nu salawasna disuhunkeun dina unggal sholat (.... ihdinashshiraathal mustaqiim).

Geura ieu urang lenyepan. Kacaturkeun hiji jalma anu ahli tatanen keur motongan regang hiji tangkal. Tada teuing nyerina waktu eta regang dipotongan teh. Mun bisaeun nyarita mah, moal boa si eta tangkal nyebutkeun telenges ka eta ahli tatanen teh. Padahal maksud si ahli tatanen motongan regang mah demi kahadean eta tangkal, sangkan eta tangkal jagana ngadatangkeun buah nu loba.

Aya deui lenyepaneun teh. Hiji indung mawa anakna nu keur gering ka dokter. Ku dokter eta budak teh disuntik. Barang gejos jarum suntikanana dicecebkeun, budak teh ceurik jejeritan. Sangkilang nepi ka adug lajer, nu jadi indungna mah tenang bae, da puguh nu matak mawa anakna ka dokter teh sangkan anakna cageur, sehat deui kawas sasari.

Ku gambaran sarupa kitu, eces yen pikeun jalma anu tawadu mah kanalangsaan atawa katunggaraan nu karandapan ku dirina teh saestuna kanyaah Alloh. [] Ida Rukmana