Aji Saka

Cenah baheula, nu ngadeg raja di pulo Jawa teh bangsaning buta ngaranna Dewata Cengkar, kaceluk sok ngadaharan jelema. Unggal poe Ki Patih ngeleyeng ka unggal lembur neangan dahareun raja. Ari karesep Dewata Cengkar kana daging budak. Atuh di lembur-lembur teh geus jarang budak. Dina ayana ge sok disumputkeun ku indung bapana. Rahayat kacida susah jeung ijideunana ka Dewata Cengkar teh. Tapi dalah kumaha, puguh lain lawan-lawaneun.

Kocap di Pulo Majeti aya satria sakti jeung dua panakawanna. Sang sinatria ngaranna Aji Saka, ari panakawanna Dora jeung Sembada. Aji Saka ngadengeeun yen rahayat di Pulo Jawa keur nandangan susah lantaran polah rajanya. Timbul niatna hayang nulungan.

“Kula rek ka pulo Jawa mateni Dewata Cengkar…” ceuk Aji Saka ka para panakawanna. “Maraneh dagoan di dieu. Omat ulah kamamana, nepi ka kula balik deui ka tempat ieu.

Memeh miang, Aji Saka nitipkeun peso pangot bari papadon, “Ieu peso rawatan bisi maraneh kuma onam….” Pokna, “ Kade ulah dibikeun ka sasaha, iwal ti ka kaula…”

Geus kitu Aji Saka indit, ninggalkeun dua panakawanna.

Kocap Ki Patih saparakanca keur apruk-aprukan neangan budak ka unggal lembur. Barang srog ka hiji tempat, katingali aya budak lalaki kasep jeung lintuh. Ki Patih teh bet malik nyaah, boro-boro hayang newak. “Geuwat kaditu nyumput elu, bisi kapanggih ku Dewata Cengkar….” ceuk Ki Patih. Tapi aneh budak teh lain kadua sieun, malah kalah nangtang hayang didahar ku Dewata Cengkar. Ki Patih Olohok.

“Uing sanggup maehan Dewata Cengkar, tapi menta buruh…” ceuk eta budak.

“Naon buruhna…?” tanya Ki Patih.

“Menta tanah salegana iket uing…” tembal eta budak.

Bari aneh jeung pang-pangna mah cangcaya, Ki patih nyanggupan. Nya budak teh dibawa ka karajaan.

Dewata Cengkar pohara atoheunana ningali budak kasep, lintuh jeung berseka. Teu diengkekeun deui budak teh diranggeum sarta tuluy dihuapkeun. Tapi aneh teu teurak digegel. Digayem dikukumaha angger teu bisa. Tungtungna diteureuy hirup-hirup. Orokaya ngadon melag dina tikoro. Dewata Cengkar ohek-ohekan kabeureuyan. Budak teh kalah ngagedean dina tikoro. Lila-lia tikoro teh debrah, Dewata Cengkar tiwas…

Gancangna carita budak teh bijil tina sungut Dewata Cengkar. Jleg jadi satria, horeng inyana teh Aji Saka, nu niatna memang rek mateni Dewata Cengkar tea. Ki Patih nedunan pamenta Aji Saka nu menta tanah salega iketna. Tapi aneh deui wae, barang diamparkeun dina taneuh, iket teh ngagedean. Ngagedean, ngagedean tuluy ngagedean nepi ka sakuliah pulo Jawa karungkup ku iket. Pamustunganana Aji Saka dileler jadi raja ngaganti Dewata Cengkar.

Sanggeus jadi raja Aji Saka inget ka dua panakawanna nu bareto ditinggalkeun jeung dipihapean peso pangot. Nya marentahkeun ki Patih sina ngangkir ka karajaan. Heuleut sawatara lila Ki patih geus balik deui, tapi ngan ngiringkeun hiji nyaeta Dora, da cenah Sembada mah teu daekeun. Aji Saka wera asa teu digugu ku Sembada. Nya ngajurungan deui Dora supaya maksa Sembada. Gancangna carita Dora indit deui rek maksa Sembada.

Cunduk ka nu dijugjug, Sembada keur ngahuleng bari nyenyekel peso pangot. Dora maksa ngajak nepungan dununganana, tapi Sembada keukeuh embung. Pokna teh,

“Pan bareto ge ceuk dunungan ulah ka mamana, saacan anjeunna mulih deui ka dieu…”

“Enya tapi kami ge ditimbalan kudu mawa andika ka karajaan…!” ceuk Dora ambek.

Sembada angger mugen.

“Sok atuh kadieukeun peso pangotna ari andika keukeuh embung mah…” ceuk Dora deui.

“Moal bisa…” jawab Sembada, “Pan bareto ge ka kaula nitipkeunana, saur anjeunna ulah dibikeun ka sasaha iwal ti ka anjeunna….”

Dora napsu pedah Sembada wangkelang. Sembada oge napsu pedah Dora keukeuh maksa. Antukna duanana garelut rongkah pisan, nepi ka tiwasna…

Aji Saka antukna miang rek ngariksakeun dua panakawanna. Breh Dora jeung Sembada geus ngababatang patunjang-tunjang. Aji Saka ras kana caritaanana bareto basa rek lunta. Rumasa inyana salah. Keur pangeling-eling kana kasatiaan panawanna, Aji Saka nyieun tulisan dina tangkal kai ku peso pangot. Kieu unina: hana caraka data sawala pada jayanya maga batanga. Hartina kira-kira: aya dua utusan, marebutkeun bebeneran, sarua gagahna, nepi ka maranehna tiwas. Cenah eta tulisan teh nu kiwari jadi Cacarakan…. [] Mang Nanang