Cara Hirup Kaum Sufi

Aya kaum Sufi Islam anu sasauran kieu: “Kuring geus milih opat perkara, sarta geus miceun sakabéh pangaweruh dunyawiah.”

Pok aya nu nanya, “Naon anu opat perkara téh?”

“Kahiji,” kaum Sufi ngawaler, “Kuring nyaho yén saban poé kadaharan pikeun kuring geus ditangtukeun, moal kurang moal leuwih. Ku sabab kitu, kuring moal tipoporosé pikeun nambahanana. Nu kadua, kuring nyaho yén kuring boga hutang ka Alloh, tur moal aya saurang ogé anu bisa mayar éta hutang demi kuring. Ku sabab kitu, kuring kudu satékah polah pikeun ngalunasanana. Nu katilu, kuring nyaho yén maot keur ngadodoho kuring. Ku sabab kitu, kuring tatahar pikeun ngayonanana. Nu kaopat, kuring nyaho yén Alloh teu weléh nyérangkeun kuring. Ku sabab kitu, kalintang érana seug kuring milampah hal anu teu sapagodos sareng pangersa-Na.” [] Endang GG