Ceuk Neymar....

Neymar | Foto: nationalturk.com

Keur nu resep kana maen bal tangtu moal aya nu bireuk ka ngaran Neymar, bintang Brazil “papan atas” nu sajajar jeung Messi, Ronaldo, Gareth Bale jeung sajabana. Sababaraha waktu katukang, sanggeus kleubna ngelehkeun lawanna, Neymar nyarita kurang leuwihna kieu, “Urang teh kudu ngahargaan jeung nganuhunkeun ka nu eleh, sabab urang moal disebut meunang lamun euweuh nu eleh.“

Kalimah basajan, nu sabenerna bisa diucapkeun ku saha bae. Tapi kulantaran diucapkeun ku Neymar, bintang kelas dunia nu kasohor jeung kaitung budak keneh, eta ucapan teh jadi narik. Lantaran kawilang bijak tur diucapkeun ku selebriti. Nu pantesna mah keur meujeuhna sombong, adigung, jeung ria. Lain ngucapkeun omongan siga patwa pujangga samodel kitu.

Mun urang daek neuleuman, eta omongan “budak sohor” teh jembar pihartieunana. Lain sakadar dina urusan maen bal, tapi ngambah kana sagala kahirupan. Moal disebut meunang lamun euweuh nu eleh. Moal disebut pinter lamun euweuh nu bodo. Moal disebut beunghar lamun euweuh nu sangsara. Moal disebut mulia lamun euweuh nu hina. Moal disebut kawasa lamun euweuh nu dikawasa. Moal disebut menak lamun euweuh cacah, jeung saterusna.

Ilaharna jelema nu ngabogaan nafsu takabur, di mana keur di luhur sok rasa aing nganggap handap ka sahandapeun. Nu matak sok loba kabejakeun nu beunghar ngahina ka nu malarat. Nu pinter teu hayang wawuh jeung nu bodo. Nu jeneng misahkeun maneh ti somah. Kiai ngarasa leuwih mulia ti nu tara ka masjid.

Saripati omongan Neymar: nu meunang kudu ngajenan ka nu eleh jeung kudu nganuhunkeun. Hartina ulah takabur pedah keur meunang jeung ulah nganggap enteng ka nu eleh. Atawa ulah takabur pedah keur di luhur nepi ka teu nganggap ka nu sahandapeun. Ieu teh hiji atikan moral. Ceuk agama ge memang kitu.

Leuwih jerona ieu teh bisi tumerap ka diri urang. Bisi dina hiji waktu urang ngalaman apes aya di handap. Pisakumahaeun mun urang dihina ku saluhureun. Mungguhing hirup di dunya teu angger dina hiji kaayaan. Ceuk Si Kabayan tea mah, mun urang keur bungah kudu inget isuk-pageto urang bakal susah. Lantaran hirup lir ibarat kincir anu keur muter.

Omongan Neymar bisa jadi ukur sakadar omongan. Tapi taya salahna mun urang ngama’naan saripatina. Nu alus kudu dicokot najan kaluar tina bujur, upamana endog hayam. Neymar sacara teu langsung mepelingan ka urang…[] Mang Nanang