Keur Kumpulan Ditangkep

Ilustrasi tina portalmadura.com

Dina awal taun-taun tilupuluhan di Bandung keur meujeuhna rame ku pergerakan kamerdikaan Indonesia. Bapa kuring harita geus jadi anggota partey politik “Partindo” (Parta Indonesia) pingpinan Bung Karno. Bapa kuring sok mindeng nungkulan rapat-rapatnumum (saha bae meunang nungkulan) nu di ayakeun ku Partindo atawa partey-partey politik sejenna, kuring sok dibawa ku bapa nungkulan, atawa ngahaja sorangan datang nungkulan.

Hartita oge kuring hayang jadi anggota Partindo, ngan ku bapa kuring dicarek. Ulah waka, cenah, tacan meujeuhna; mun dek oge, asup teh ka partey nu sarua tapi keur golongan pamuda. Nya kabeneran di Bandung aya hiji partey ngaranna “Suluh Pemuda Indonesia” dipondokkeun SPI, pingpinan hiji pamuda gandang pertengtang jeung gede wawanen. Nya pareng dina bulan Januari 1933 kuring asup jadi anggota eta partey. Unggal malem minggu sok ngayakeun rapat, medar rupa-rupa masalah nu museur kana urusan politik jeung ngudag kamerdikaan Indonesia, jeung rea-rea deui hal-ihwal sejenna.

Dina hiji peuting, basa keur rapat (tempatna di Sekolah Rakyat Nasional di Regentsweg, kiwari Jalan Dewi Sartika), poho deui titimangsana mah (tanggal, bulan jeung taunna), rapat teh nepi ka pukul 12 peuting tacan lekasan. Kira-kira pukul satu peuting, basa keur husu-husuna nu pidato jeung nu ngaregepkeun, ti luar aya nu ngetrokan panto. Barang dibuka teh, aya jelema jangkung gede disetelan bodas make dasi jeung dibendo, di tukangeunana aya deui jelema duaan, papakeanana basajan, make kerepus teu didasi. Kuring apal ka eta jelema nu jangkung gede, da sok mindeng kapanggih dina saban rapat umum sok aya nungkulan, babarengan jeung anggota pulisi Walanda, nyaksian jalanna rapat. Cek bapa kuring basa ditanyakeun, eta teh cenah camat ti bagian Reserseu Politik; ari nu duaan deui, kuring yakin, eta teh serseu nu jadi bawahanana. Taya lian eta teh patugas ti pamarentah (jaman jajahan Walanda) nu kudu ngukuntit jeung ngawaskeun jalanna paguyuban-paguyuban politik/kamerdikaan Indonesia.

Tamu-tamu teh diabageakeun ku pihak pingpinan (Ketua rapat/partey). Ti dinya kuring ngarti yen kuring jeung sarerea nu aya d dinya ditangkep. Pingpinan jeung anggota-anggota teu majar kumaha, budal digiring ku tiluan ka kantor pulisi seksi I, nu aya di juru alun-alun beulah kidul-kulon (ayeuna toko mewah Parahiangan Plaza). Di dinya saurang-saurang dipariksa, ditanya ngaran, umur, pagawean atawa sakola, naon sabab pangna asup jadi anggota partey politik, jeung rea-rea deui pertanyaan sejenna. Kuring (jeung sarerea sarua) nerangkeun yen hayang nyaho jeung bisa kana elmu politik geusan ngahontal kamerdikaan Indonesia. Ku kuring diterangkeun deuih yen bapa kuring oge anggota partey politik Partindo, atuh kurinh anakna musabah asup jadi anggota partey politik golongan pamuda. Sagala (sakabeh) pertanyaan dijawab ku sabalakana bae, taya nu dipinding-pinding atawa dijieun-jieun (teges teu ngabohong).

Sajeroning keur tanya-jawab aya saurang nu hadir milu nyatetkeun mangrupa proses perbal. Eta teh pagawe pulisi di eta kantor. Ahirna kuring kudu nandatangan dina eta proses perbal. Memeh diteken dibaca heula, tetela eusina teh pertanyaan jeung jawaban kuring tadi tea. Daek teu daek kudu daek, nya tret bae ditandatangan ku kuring.

Kira-kira pukul 4 subuh kuring rengse dipariksa, kakara dikaluarkeun, meunang balik. Jeung babaturan teu papanggih deui. Aya oge sababaraha urang di jero keneh keur dipariksa. Di jalan jeung alun-alun geus taya jelema nu ngulampreng. Aya oge hiji dua jelema di buruan masigit (kuloneun alun-alun) nu rek muru solat subuh.

Barang datang ka imah dicaritakeun ka bapa kuring sagala hal-ihwal nu kaalaman ku kuring peuting eta. Cek bapa: “Jamak we sakitu mah.... Batur mah saperti Bung Karno jeung sejen-sejenna, apan aya nu diinternir mangtaun-taun jeung dibuang ka peuntas saumur-umur....”

Isukna kabaca dina sawatara koran Walanda jeung Sunda nu kaluar di Bandung, ngajareblag judulna: Anggota-anggota SPI Ditangkepan. [] S. Sauni