Si Kabayan Ngala Tutut

Si Kabayan teuing ku ngedul. Unggal poe pagaweanana ukur sare jeung dahar. Nyi Iteung pamajikanana geus keseleun, komo mitohana mah ngewaeun pisan, ngalandihna ge si Borokokok. Dina hiji poe nyi Iteung nitah ngala tutut ka si Kabayan. Nu dititah kaleked pisan, matak cape nu nitah.

“Mun teu daek kami moal nyangu, pek we rek barang dahar naon…” ceuk nyi Iteung bari ngagadeud.

Dikitukeun teh si Kabayan angger teu nurut, kalah ngajentul. Gejlig we nyi Iteung indit.

“Iteung rek kamana…?” ceuk si Kabayan.

“Rek menta dahar ka abah….” walon pamajikanana.

“Ari uing…?”

“Sabodo….”

“Heueuh atuh uing rek ngala ka sawah, tapi tong indit nya…anggursi nyangu sing gede…” Si Kabayan sieuneun rek ditinggalkeun mah.

Bari diharudum ku sarung si Kabayan indit ka sawah, mawa ayakan keur wadah tutut. Harita poe teh keur panas. Langit lenglang bersih ma’lum keur halodo. Si kabayan mapay-mapay galengan rek ngala tutut di sawah mitohana. Barang geus nepi ret ka handap , ana gebeg teh….

“Ambuiiing… geuning jero pisan sawah teh….” cenah bari bangun pohara paurna.

Harita ari tutut tea mah aya ngarambang, ngan si Kabayan teu wani nyokotanana, da sieun tigebrus. Ceuk pamikirna sawah teh jero pisan, da kelewungna langit ge nepi ka katembong. Ma’lum tengah poe bari cai sawah keur herang. Sajongjongan manehna ngahuleng… Ahirna manggih akal, nya tutut teh dikoeran ku regang awi, bari manehna angger di luhur galengan dodongkangan . Teu wani turun da sieun…

Geus sakitu lilana tutut teh teu beunang hiji-hiji acan. Nyi Iteung nu nungguan di imah geus keseleun ngalelentuk. Panasaran manehna nyusul ka sawah. Ana breh teh si Kabayan keur cingogo dina galengan bari ngoeran tutut.

“Geus beubeunangan sakumaha tutut teh, akang…?” ceuk nyi Iteung.

“Can meunang hiji-hiji acan da hese ngalana…” walon si Kabayan.

“Pantes atuh da dikoeran kitu,…turun cokotan ku leungeun…!“ Nyi iteung rada teugeug.

“Ih sudi teuing…, ngarah uing tigebrus? Tenjo tuh sakitu lewangna. Langit ge nepi ka katenjo…” jawab si Kabayan.

Nyi iteung ambek. Srog ngadeukeutan si Kabayan. Teu antaparah si Kabayan disuntrungkeun ka sawah, gujubar..! Ukur samet mumuncangan cai sawah teh. Si Kabayan nyerengeh,

“Ei da deet….” cenah.

Nyi Iteung jamedud. [] Mang Nanang