Tina “Emang” jadi “Tuan”

Ilustrasi tina agusmulyadi.web.id

Ieu teh carita kajadian dina taun 1974, basa indung kuring kakara rengse nyieun sorondoy permanen beulah wetan gigireun nu geus aya. Biasa bae unggal poe kuring sok beberesih di pipir jeung buruan, lantaran bala jeung kotor urut nu nembok jeung tukang kayu. Ari beberesih tea, aya sasapu, ngored, ngararata taneuh, mereskeun batu-batu laleutik jeung sajabana. Teu make papakean cara keur ka kantor (buburuh ka pamarentah) atawa ka masigit (ngadon salat Jumaah), biasa bae make calana kolor pondok jeung singlet; ari suku mah make sandal, da sieun kacugak ku paku atawa beling, ma’lum barala keneh.

Keur jongjon cingogo tungkul nyabutan jukut laleutik, nyanghareupan imah nukangan jalan gede (imah teh di sisi jalan gede), ana gero ti tukang aya nyonya (WNI turunan Walanda) nungtun budak leutik hiji: “Mang, mana yang punya rumah?”

Kuring ngalieuk ka tukang tanggah bari malik nanya: “Ada apa nyonya?”

“Mana Mang yang punya rumah?” nanya deui nyonya teh rada tarikan saeutik.

“Ada” jawab kuring bari hayang nyaho naon maksud si nyonya.

“Siapa?” keukeuh nyonya teh nanyakeun saha-sahana nu boga imah.

“Saya” cek kuring bari nangtung hormat, pikiran teh tangtu kana rek nanyakeun imah nu kakara anggeus tea.

“O.... Tuan....” kawas nu rada era nyonya teh bari tuluy nanya deui rada hormat, teu teugeug teuing cara tadi ngomongna: “Apa rumah ini akan disewakan?”

“Tidak nyonya, mau dipake sendiri.”

“Oooo....” cek nyonya teh bari permisi, tuluy ngaleos mapay sisi jalan ka kulonkeun....”

Kuring oge sajongjongan mah ngahuleng we, mikiran, behna mah jelema daek ngajenan teh ka nu boga imah, ari ka nu (buburuh) ngored (teu boga imah) mah mani kawas ka naon mah.... [] S. Sauni