Patugas KUA Teu Apaleun NA

Ilustrasi. | sundaonline.com

Anak kuring anu cikal rek rarabi ka urang Kuningan. Ku sabab kitu kulawarga ti calon pamajikanana meredih “surat ngadon nikah” ka anak kuring. Salaku bapana kuring ngarasa tanggung jawab pikeun ngayakeun eta surat. Ngan kuring tacan apal, kumaha prosedurna pikeun boga eta surat. Ma’lum apan kuring tacan boga pangalaman ngawinkeun anak. Nya kuring tatanya. Poe Senen, 13 April 2015, bada asar kuring ka Kantor Urusan Agama (KUA) Kacamatan Cangkuang Kabupaten Bandung anu pernahna teu jauh ti padumukan kuring di Sanggar Indah Banjaran.

Sanajan geus sore, untung aya keneh patugas di eta kantor. Kalayan someah eta patugas anu kasep siga Ustadz Yusuf Mansyur teh ngabageakeun kuring. “Aya pikersaeun naon, Pa?” saurna tumanya. Pok kuring nyaritakeun pamaksudan rek ngawinkeun anak tea. “Oh, upami kitu mah, hartosna tuang putra teh meryogikeun NA,” saurna deui bari tuluy ngajentrekeun prosedurna.

Cek eta patugas KUA, ari NA teh dikaluarkeunana ku pamarentahan desa ngaliwatan P3N. Samemeh ka desa, kudu boga surat pengantar ti RT-RW. Salian ti surat pengantar, lampirkeun potokopi KTP calon panganten, potokopi KK, oge data nami calon panganten istri, nami ramana, nami kacamatan sareng kabupatenna. “Upami tos aya surat pengantar sareng lampiranana mah kontak we abdi,” saurna bari tret nuliskeun nomer hapena dina kertas sacewir. “Ke abdi ngontak P3N sina sumping ka dieu. Janten engke Bapa sareng P3N tepangna di dieu,” saurna deui ngeceskeun.

Ngadenge kitu teh kuring atoh, asa digampangkeun nyorang prosedurna. Ngan aya keneh nu rek ditanyakeun teh. Sanajan ti tadi ngomongkeun NA, saenyana kuring tacan apal, ari NA teh kancahan tina naon? Bari era oge kuring waleh, nanyakeun ka eta patugas anu make saragam Hansip. “Dupi NA teh singkatan tina naon, Pa?” cek kuring.

Ditanya kitu ku kuring teh anjeunna kalah ka pungak-pinguk, ngahuleng sajongjongan. “Aduh, naon atuh nya NA teh....” pokna bari ngabelengeh seuri.

“Upami P3N singkatan tina naon?” kuring nanya deui.

Eta patugas teh ngabelengeh deui seuri tandaning teu apaleun naon papanjanganana P3N. Puguh we waktuna mulang ti KUA teh kuring bari nahan piseurieun. “Geuning lain kuring wae anu teu apal kana papanjanganana NA jeung P3N teh, pantar patugas KUA oge teu apaleun,” bari leumpang balik ka imah teh hate kuring galecok sorangan.

Nepi ka imah, kuring nyaritakeun eta pangalaman ka pamajikan. Puguh we pamajikan teh kuat ka ngehkey bari gogodeg. “Lucu, patugas KUA teu apaleun papanjanganana NA jeung P3N,” cek pamajikan.

“Hus, ulah nyeungseurikeun kitu, kawas nu apal we....” kuring ngahuit.

“NA mah singkatan tina Nikah Agama, lin?” omong pamajikan.

“Cek saha eta teh?”

“Enya meureun..........” pamajikan nyeuleukeuteuk deui.

Isukna, bada isa kuring ka Pa RT rek nyieun surat pengantar tea. Pa RT mah geus teu aneheun ka nu rek nyieun NA teh. “NA teh No Accident, sabalikna tina MBA, nya eta Married By Accident,” pokna bari nyeuleukeuteuk. [] Endang GG