Pamiceunan Runtah di Jalan Gandasari Kabupaten Bandung Ngalegaan

Pamiceunan runtah urut GPSS di Jalan Gandasari Kabupaten Bandung beuki ngalegaan. 
| sundaonline.com

Duka kumaha jagana. Nu tangtu mah tempat pamiceunan runtah urut GPSS (Gerakan Peduli Sampah Sabilulungan) di Jalan Gandasari, Kabupaten Bandung, beuki parna kaayaanana. Geura tingali, runtahna ngalobaan, tempatna ngalegaan. Ayeuna mah, lain di GPSS-na wungkul masarakat miceun runtah teh, tapi wani nepi ka peuntaseunana.

Basa sundaonline ngulampreng ka palebah dinya, Saptu, 24 Oktober 2015, katangen runtah, jaba ti ngahunyud teh, amayacak di sisi jalan. Padahal Jalan Gandasari ayeuna mah kawilang alus, da geus diomean ku pamarentah. Piraku teu kitu-kitu acan mah, da sidik apan Jalan Gandasari teh remen kaliwatan ku beus pariwisata, malah kaitung loba tempat wisata di sapanjang eta jalan teh. Aya panginepan, pamancingan, tempat ngojay, restoran, jeung sajabana.

Hanjakal, carekna hayang ngawujudkeun lingkungan kota anu pikabetaheun teh, pamarentah katut masarakat bangun nu api lain, hare-hare, jeung meungpeun carang. Ongkoh dipiharep jadi tempat anu pikareueuseun balarea, tapi eta jalan teh disareukseukan jeung dibauan ku runtah.

Ti heula kungsi dibejakeun, tempat pamiceunan runtah di Jalan Gandasari teh tadina mah pamiceunan runtah ilegal. Duka kumaha caritana, tuluy ku pamarentah eta pamiceunan runtah ilegal teh dijadikeun tempat GPSS. Maksudna mah alus peta pamarentah kitu teh. Ngan masarakat salah tarima, kalah ka der asa dihempekkeun miceun runtah ka eta tempat. Balukarna, GPSS teh lain mapaesan kota jadi beresih tur endah katingalina, malah sawangsulna ku ayana GPSS pamandangan kota jadi ramijud jeung sareukseuk da bala ku runtah anu ngagunung jeung amayacak di sisi jalan.

Ku kituna, meureun pamarentrah sadar, ku pamarentah GPSS teh dikakatan deui. Bak runtahna anu warna koneng teh dijadikeun pot tutuwuhan anu—meureun—maksudna mah ngarah masarakat teu miceun deui runtah ka eta tempat.

Ngan kawasna bae kalakuan goreng patut teh geus ngabaju di masarakat. Sanajan geus dipelakkan tutuwuhan oge, eta tempat urut GPSS teh angger we dipake pamiceunan runtah. Malah ayeuna mah beuki kacida gorengna ahlak masarakat teh, da buktina eta pamiceunan runtah di Jalan Gandasari lain beuki ngaheureutan—jajauheun nepi ka euweuhna mah, tapi kalah ka jadi ngalegaan. Runtah ngahunyud jeung pabalatak nepi ka peuntaseunana.

Duka saha oknum masarakat anu sok miceunan runtah ka dinya teh. Tug ka kiwari tacan aya masarakat anu ngaku sok miceun runtah ka GPSS, aeh maksud teh ka tempat urut GPSS. [] Endang GG