Pamiceunan Runtah di Jalan Gandasari Resmi Jadi TPS?
 |
| Pamiceunan runtah di Jalan Gandasari, Cangkuang, Kabupaten Bandung, ngalegaan. | sundaonline.com |
Bawaning ku kesel runtah di hareupeun imahna tacan diangkut wae ku patugas, DP, warga perumahan Sanggar Indah Banjaran Kabupaten Bandung kapaksa miceun runtahna ka pamiceunan runtah di Jalan Gandasari, Kacamatan Cangkuang, Kabupaten Bandung. Peta DP sarupa kitu diturutan ku sawatara warga nu lianna. Salah saurangna DR anu nurutan DP teh. Cek maranehna, upama teu geuwat diangkut ka Jalan Gandasari, eta runtah anu geus ngahunyud di hareupeun imah bakal ngagunung, bau busuk, jadi bibit panyakit.
“Matakna, ari runtah henteu diangkut wae mah, mending oge angkut we ku sorangan ka TPS Gandasari,” cek DP kalayan daria.
Aeh, naha memangna pamiceunan runtah di Jalan Gandasari teh geus diresmikeun jadi TPS (Tempat Pembuangan Sampah)? Duka teh teuing! Ngan meujeuhna upama DP boga pamadegan sarupa kitu teh, da geuning nu miceun runtah ka Jalan Gandasari teh lain warga Sanggar Indah Banjaran wungkul. Ti lelewek sejenna oge loba nu mariceun runtah ka dinya.
Cek Pa Ajat (60), warga Jalan Gandasari, Kacamatan Cangkuang, Kabupaten Bandung, nu mariceun runtah ka dinya teh ti mana-mendi. Biasana wanci janari atawa subuh mariceunna teh. Aya nu make sapedah motor, aya oge nu make mobil bak, ngangkut runtahna teh. Tapi aya deuih nu miceun runtah dina wanci isuk-isuk atawa pabeubeurang. Biasana, mun isuk-isuk, jalma anu rek indit ka pagaweanana make sapedah motor. “Bari ngaliwat, runtah dina keresek teh lung dialungkeun,” cek Pa Ajat ngeceskeun ka sundaonline.com. “Ah, jalma nu geus taya kaera,” pokna deui ngageremet.
Geus kaitung lila kabiasaan balarea sarupa kitu teh. Padahal lahan anu dipake pamiceunan runtah teh lahan milik pribadi, lain bogana pamarentah. Tapi, sabada pamarentah ngawangun Gerakan Peduli Sampah Sabilulungan (GPSS) di sawatara titik di Kabupaten Bandung, kaasup di Jalan Gandasari, Kacamatan Cangkuang, warga masarakat anu sok mariceun runtah sambarangan teh asa dihempekkeun, asa disadiakeun wadah runtah umum.
Ti harita, loba warga masarakat Kabupaten Bandung anu nganggap yen GPSS teh TPS. Padahal maksud pamarentah mah pasti teu kitu. Ku lantaran GPSS ngabalukarkeun runtah di Kabupaten Bandung ngaleuyah ngabalaan jalan-jalan raya, ngaruksak endahna pamandangan kota, nya ahirna GPSS teh diudaran deui ku pamarentah. Bak GPSS anu warna koneng teh dijadikeun pot tanaman hias, ngarah warga masarakat teu miceun deui runtah ka tempat urut GPSS. Tapi, adat geus kaurung ku iga, kabiasaan goreng teu gampang diomeanana. Angger we loba warga masarakat anu mariceun runtah ka dinya. Malahan mah runtah di Jalan Gandasari teh beuki loba, nyontang lahan leuwih lega deui.
Ku kanyataan sarupa kitu, kaciri pisan hengkerna Pamarentah Kabupaten Bandung dina ngungkulan perkara runtah, utamana dina sual ngayonan tingkah polah balarea anu sok mariceun runtah ka dinya. [] Endang GG
“Matakna, ari runtah henteu diangkut wae mah, mending oge angkut we ku sorangan ka TPS Gandasari,” cek DP kalayan daria.
Aeh, naha memangna pamiceunan runtah di Jalan Gandasari teh geus diresmikeun jadi TPS (Tempat Pembuangan Sampah)? Duka teh teuing! Ngan meujeuhna upama DP boga pamadegan sarupa kitu teh, da geuning nu miceun runtah ka Jalan Gandasari teh lain warga Sanggar Indah Banjaran wungkul. Ti lelewek sejenna oge loba nu mariceun runtah ka dinya.
Cek Pa Ajat (60), warga Jalan Gandasari, Kacamatan Cangkuang, Kabupaten Bandung, nu mariceun runtah ka dinya teh ti mana-mendi. Biasana wanci janari atawa subuh mariceunna teh. Aya nu make sapedah motor, aya oge nu make mobil bak, ngangkut runtahna teh. Tapi aya deuih nu miceun runtah dina wanci isuk-isuk atawa pabeubeurang. Biasana, mun isuk-isuk, jalma anu rek indit ka pagaweanana make sapedah motor. “Bari ngaliwat, runtah dina keresek teh lung dialungkeun,” cek Pa Ajat ngeceskeun ka sundaonline.com. “Ah, jalma nu geus taya kaera,” pokna deui ngageremet.
Geus kaitung lila kabiasaan balarea sarupa kitu teh. Padahal lahan anu dipake pamiceunan runtah teh lahan milik pribadi, lain bogana pamarentah. Tapi, sabada pamarentah ngawangun Gerakan Peduli Sampah Sabilulungan (GPSS) di sawatara titik di Kabupaten Bandung, kaasup di Jalan Gandasari, Kacamatan Cangkuang, warga masarakat anu sok mariceun runtah sambarangan teh asa dihempekkeun, asa disadiakeun wadah runtah umum.
Ti harita, loba warga masarakat Kabupaten Bandung anu nganggap yen GPSS teh TPS. Padahal maksud pamarentah mah pasti teu kitu. Ku lantaran GPSS ngabalukarkeun runtah di Kabupaten Bandung ngaleuyah ngabalaan jalan-jalan raya, ngaruksak endahna pamandangan kota, nya ahirna GPSS teh diudaran deui ku pamarentah. Bak GPSS anu warna koneng teh dijadikeun pot tanaman hias, ngarah warga masarakat teu miceun deui runtah ka tempat urut GPSS. Tapi, adat geus kaurung ku iga, kabiasaan goreng teu gampang diomeanana. Angger we loba warga masarakat anu mariceun runtah ka dinya. Malahan mah runtah di Jalan Gandasari teh beuki loba, nyontang lahan leuwih lega deui.
Ku kanyataan sarupa kitu, kaciri pisan hengkerna Pamarentah Kabupaten Bandung dina ngungkulan perkara runtah, utamana dina sual ngayonan tingkah polah balarea anu sok mariceun runtah ka dinya. [] Endang GG
Komentar
Posting Komentar