Hj. Siti Rokayah, Guru nu Mikaresep Kasenian Sunda

Hj. Siti Rokayah nu katelah Bunda Siti, guru SD Negeri Gatot Subroto Kompleks PPI Bandung, ti bihari nepi ka kiwari mikaresep kasenian Sunda.

Ku resepna kana kasenian Sunda, di bumina Perum Antapani kota Bandung, aya rohangan husus paranti ngayakeun acara tepung lawung komunitas atawa kulawarga, unggal bulan puasa dipake buka bareng sarta ceramah Ramadan. Cik keneh oge di eta tempat aya acara sawala komunitas Paguyuban Urang Pasundan (Purpas) dina raraga nyanghareupan milangkalana Purpas ka I di Gedung Futsal My & Me Soreang, Kabupaten Bandung.

"Alhamdulillah abdi ngaraos bingah kasumpingan parawargi Purpas teh, janten nambihan baraya," ceuk Hj. Siti Rokayah ka sundaonline.”Tujuan milu aub jadi anggota komunitas Purpas teh hayang ngamumule basa Sunda, sangkan ulah nepi ka ical. Sugan we kapayunna Purpas jadi cukang silaturahim diajar basa Sunda,” pokna deui.

Salian mikaresep kasenian Sunda, Bunda Siti oge rapekan nyiptakeun rohangan sangkan dipikabetah. Aya balong, aya saung nu di sakurilingna dipasieup ku pot kembang. 

Bunda Siti geus aya kana tilu puluh taunna ngabdi jadi guru teh. “Muga-muga pangabdian jadi guru salila ieu sing aya ajen ibadah ka Alloh pikeun bekel mulang ka manten-Na, tur mulus rahayu nepi ka purnabakti,” pokna, kebek ku pangharepan. [] Ida Rukmana