Aming Hermawan, "Ulah Era Nyarita ku Basa Sunda"

Aming Hermawan dina Tepung Lawung Paguyuban Urang Sunda (Purpas) di Kampung Batu
Kabupaten Bandung. 

Waktu Tepung Lawung Paguyuban Urang Sunda (Purpas) di obyek wisata Kampung Batu, Kacamatan Baleendah, Kabupaten Bandung, aya acara maca sajak, di antara nu maca sajak teh nyaeta Aming Hermawan, pituin Bogor nu kiwari nganjrek di Cicalengka.

Harita Aming maca sajakna meunang pangbagea ti para mitra Purpas tur teu weleh sumanget hayang nanjeurkeun kasundaan, mugia kahareupna komunitas Purpas bisa leuwih maju. Aming Hermawan, lain panyajak, lain pangarang, tapi Aming ayeuna keur diajar basa Sunda, rek tetelepek ka para sastrawan Sunda."Abdi umajak ka nu ngangken urang Sunda hayu urang ngamumule basa Sunda, sarta dina nyarios ulah era ku basa Sunda," ceuk Aming Hermawan ka sundaonline.com, sawatara waktu kaliwat.

Ku lantaran Aming teh mancen damel di Jakarta, kulawarga di Cicalengka teu jadi hewagan, bisa ditempuh dua minggu sakali, oge masih bisa ngaluangkeun waktu aktif dina kasundaan jeung Karang Taruna. Saenyana Aming Hermawan ti keur rumaja geus resep nulis ku basa Sunda, remen kutrat-kotret sajak Sunda, nulis lagu Sunda, tapi hasil karyana can wani diumumkeun ka balarea.

"Ah, kapungkur mah mung latihan, Kang, kutrat-kotret teh tambih ngalamun wae," pokna.

Lian ti mikaresep kana basa Sunda, Aming sok tutulung ka nu butuh, tatalang ka nu susah. Ku kituna, Aming loba sobatna, gancang wanoh ka sasama. "Seueur silaturahim mah, Kang, nambihan baraya, janten hirup teh teu ngarasa keueung," pokna deui. [] Ida Rukmana